Vawiin 25th July, 2018 khan Zirtirtu semrual chungchang leh Lumpsum Grant-in-Aid School te harsatna tawh chungchang ah School Education Minister, Pu H. Rohluna chu a Pisa-ah MZP ten hmuh a ni. MZP aiawh hian L. Ramdinliana Renthlei President, Michael Lalramsanga Treasurer leh Zohmingthanga Zote ECM te an kal a ni.

MZP hruaitute chuan Education Minister, Pu H. Rohluna hi Thingtlang lamah Zirtirtu an tlem thu leh khawpui lama an tam thute, Zirtirtu semrual a ngaih thu te an sawipui a, Minister chuan MZP thu thlen te ṭha taka lo dawng sawngin, Zirtirtu indaihlohna chungchang chu inpawh tlang takin reitak sawihona neih a ni. Hemi chungchang hi karthar lama school Education Department Official te leh MZP hruaitute nen document kimchang enho a, sawiho leh nise...tiin rawtna siam a ni bawk.

Pu H. Rohluna, School Education Minister hi Lumpsum Grant-in-Aid School ten dinhmun sang zawka awm an phut avanga an harsatna tawh mek leh Zirlai ten zirna an chhunzawm theihloh chungchang sawipui a niin, Zirlai tam takin an tawrh nasat tawh avanga aṭul anga ngaihtuah sak tura ngen a ni a. Minister chuan, tûn sorkar din hmunah chuan Sorkar in sum a nei loh avangin an dinhmun hrethiam viau mah ila, Sum harsatna avangin an phut ang hian sorkar in a tihhlawhtling thei rih lo niin MZP hruaitute hi a lo hrilh a ni.

MZP hruaitute leh School Education Minister chuan Zirlaite harsatna leh Education chungchang ah aṭul anga inbiak a, inrawn tlan zel nise tiin rawtna an siam bawk.