Latest Post

MZP in Zirlai pawl hruaitu Degree nei thar leh NDA tling tharte chawimawi


MZP PRESS RELEASE


Vawiin 5th July, 2018 chhun dar 12:00 khan MZP General Headquarters chuan MZP Conference hall-ah kum 2018 chhunga MZP chhungkua, College Students’ Union Leader leh Hnampual hruaitu Degree nei thar leh National Defence Academy(NDA) tling thar mi pahnih Joel Thangeo S/o Kaizamang Thangeo leh VL. Malsawmzuala S/o VL. Zaikima te hnenah lawmpuina leh chawimawina thuziak a hlan. He hun hi Pu Joseph Lalhimpuia, Mizoram Youth Commission Chairman chuan khuallian niin a hmanpui. Tv. L.Ramdinliana Renthlei, President MZP leh Pu Joseph Lalhimpuia te’n thu an sawi bawk.


He huna thusawitu L. Ramdinliana Renthlei MZP President chuan, “MZP chhungkua hlawhtlinna changtharte chu MZP chuan thinglung takin kan lawmpui a, zirlai dang te aiin a lawmawm bik a ni. Hruaitute chu kan zirlaipuite harsatna leh college tana nasa taka hna kan thawh țhin laiin, kan zirlaipui tam zawkte chuan class țha takin an kal hman a. Hruaitute erawh chuan thil țul leh pawimawh kan ngaihtuah tam avangin zirna leh class pawh kan awm mumal thei țhin lo va. Kan zirna pawn a tuar țhin réng a, chutihrualin hruaitute chu kan zirlaipuite tan entawn tlaka result țha kan neih a țul țhin avangin midangte ai pawha kan thawhrim leh kan zir nasat hi a țul a ni. Vawiina hruaitu kan chawimawite hi in fakawmin MZP General Headquarters chuan a chhuang takzet che u a ni”, a ti.


MZP President chuan, “MZP ten Zophai-a kan buainaah khan College leh Hnampual hruaitute thawmhnaw, Bungrua leh pawisa tam tak Assam Police ten an hal chhia a, Assam Sorkar hnenah rül leh vek tura ngenna kan theh luh tawh chu tun thlengin chhanna leh a hlawhtlinna kan la hmu lo a ni. Mizoram Sorkar hotute hnenah pawh ziaka thlen a lo ni tawh bawk a. MZP chhungkua, College zirlaite leh hnampual hruaitute thil bo hlutna chu hmuh let leh a nih theih nan Mizoram chhunga Assamese awmte hnenah emaw Mizo mipuite hnenah Vehbur khawn mai MZP chuan a duh tawh a, Committee-ah ngun takin kan rel anga Assam Police-in zirlaite bungrua leh pawisa an hal ral tak te hmuh let a nih theih nan hma kan la dâwn a ni. Assam leh Mizoram ramri buaiah pawh Sorkar kaihhruainain hmalakna a kal ve bek bek a, hemi chungchangah hian MZP pawhin hma a la chhunzawm zel dawn a ni," a ti bawk.


MZP chuan National Defence Academy(NDA) tling thar mi pahnih Joel Thangeo S/o Kaizamang Thangeo leh VL. Malsawmzuala S/o VL. Zaikima te leh MZP chhungkua, College Students' Union Leader leh Hnampual hruaitute te hnenah hian  chawimawina thuziak a hlan a. MZP in a chawimawi MZP chhungkua, College Students' Union Leader leh Hnampual hruaitute mi 59 an ni.



              Sd/-


(LALNUNMAWIA PAUTU)

General Secretary