Behliangchhip | August 8, 2018: Nizan ( August 7) khan YMA Hall, Behliangchhipah MZP Headquarters Behliangchhip chuan  Jampui Mizo zirlai hlawhtlingte chawimawina hun a buatsaih a. Pi Vanlalawmpuii Chawngthu, Co-Operation, Sericulture, Fisheries Minister/Hrangturzo bialtu MLA ni bawk chuan khuallian niin a hmanpui a.

Pu Biakthankima,  MDC, Richard Zongte TCS, leh Lalentlingi TCS te chuan khuallian niin an hmanpui a. MZP General Headquarters atangin President L Ramdinliana Renthlei hovin hruaitu dantgte'n hun an hmanpui bawk.

MZP Headquarters Behliangchhip President  Lalduhsanga Thangluah chuan a kaihruai a.

Khuallian Pi Vanlalawmpuii chawngthu chuan Jampui Mizote chu hnam dang kara awm an nih angin ram darthlang an nih thu a sawi a. Ram darthlalang an nih angin aia upa zahna te, inngaihtlawmna leh tlawmngaihna nen Mizo nun ze mawi chawinung zel turin a chah a. Zirlaite chu tumruhna leh taihmakna nen zir zel tura chahin an thiamnate chu tuma laksak theih an nih tawh loh thu a sawi a. Mizote chu hnam dangin min chung en a, min zahna tur leh min ngaihsan theihna tur chuan lehkha kan thiam lehzual a ngai a. Tharum thawhna tel lovin, kan thiamna, kan finna leh theihnate hmangin ro kan rel ang a ti bawk. Social Media chu thalaite thanmawh bawk a ni tiin zirlaite chu an zirlai puitu atana hmang tangkai thiam turin a chah.

 

He hunah hian Jampui Mizo zirlai hlawhtling Class X zirlai 28 leh Class XII zirlai 38, an vaiin zirlai 66 an chawimawi.