No. E-93/MZP-GHQ/2021-2023/97        Dated, Aizawl, the 3rd April, 2023


MZP PRESS RELEASE


Vawiin April 3, 2023 (Thawhtanni) chhun dar 12 khan MZP General Headquarters hruaitute chuan an President Pu Lalnunmawia Pautu hovin Sainik School a Mizoram zirlaite chungchang-ah School Education Minister Pu Lalchhandama Ralte chu a pisa ah an hmu.

MZP chuan School Education minister hnenah hian, Sainik School-a lut phak zirlaite hi chhungkaw khat ami pawh nise, a hautak avangin full scholarship an dawn theih nan, dan dinglai awmte ennawna siamrem ngaite siamrem turin a ngen a ni.

MZP chuan, Mizoram-in zirna in kan neih hlut berte zinga mi, Sainik School Chhingchhip-ah hian Mizo naupang thiam thei leh thluak thate an lut thin a. Tunah pawh hian naupang tam takin an chhawr mek a. Chutih laiin, naupang thiam thei si lut zingah Unau a lut pawh an awm tih hriat a ni a. Chungte chu khawsak awlsam leh neinung an ni vek lova, an innghahna Full Scholarship hi unaua an dawn theih loh avangin harsatna an tawk mek a ni, a ti a.

Tuna dan ding laiah chhungkaw pakhat atanga zirlai pakhat bakin Scholarship an dawn theih loh avangin, zirlai hmakhaw eng tak pakhat chu zirna chawlhsan turin inlakchhuah a tum mek niin MZP chuan thu a dawng a. Hei hi MZP chuan pawi a ti a, zirlaite hmakhaw ngaiin he dan hi siamrem vat a nih theih nan hma a la ta a ni. MZP in a hriat theih chinah, state dangah chuan Sainik School-a zirlaite chu chhungkaw khat atangin zirlai pakhat aia tam an awm pawhin scholarship pek vek an ni.

Hemi chungchangah hian, zirlaite chu unau pawh nise, Sainik School-a lut thei chin chu full scholarship an dawn theih nan, dan dinglai awmte ennawna siamrem ngaite siamrem turin MZP chuan Sawkar thuneitute a ngen a. School Education Minister Pu Lalchhandama Ralte chuan, MZP hruaitute chu a theih chinah hma lakpui a, a lo bawhzui tur thu lo hrilhin, School Education Department khawih theih bakah pawh thuneitu sang zawkah a lo thlen tur thu a hrilh a ni.

Vawiin chawhnu vek khan MZP chuan, Mizoram Subordinate Services Selection Board (MSSSB) Chairman thar Pu C Lalhuliana chu a pisa-ah an kawm a, MSSSB hnuaia hna lakah thiamna inang rau rauah chuan ram leilung fate ngei duhsak turin an ngen a ni.



(H. LALTHUTHLUNGA ZATE)
Secretary i/c Publicity



.