No. E-93/MZP-GHQ/2021-2023/133                                Dated, Aizawl, the 28th July, 2023

MZP PRESS RELEASE

Nimin Ni 27 July, 2023 (Ningani) tlai dar 5:30 khan British Deputy High Commissioner, Nick Low leh Political Economy Adviser, Ajitha Menon te chuan MZP Pisa Pui, Treasury Square an tlawh a. MZP President Pu Lalnunmawia Pautu leh hruaitu dang ten an lo dawng sawng a. Mizo zirlai leh hna zawng mek te tan British-a hnathawh theih dan tur leh Zirlaite tan Scholarship leh zirna in hrang hrang an chhunzawm theih dan tur te leh Manipur buainaa zohnahthlak unaute harsat tawh chungchangte sawiho a ni.

MZP hruaitute chuan British Deputy High Commissioner hnenah hian Mizo zirlaite hmasawnna leh harsatna an tawh thin hrang hrang te leh Manipur buaina avanga harsatna thlengte an hrilh a. British Deputy High Commissioner, Nick Low chuan Mizote zirlaite tan theih theihtawp chhuah a inhuam thu leh a tam thei ang ber an rama hnathawka kal tura a duh thu leh kawng zawn sak an inhuam thu a sawi a. Zirlai harsatna tawkte leh hna zawng mekte tan an inhawn reng thu a sawi a. British Deputy High Commissioner, Nick Low hnena thu thlen te hi a hlawhtlin theih nan a rang lama sawiho leh nise tih a ni.

Nimin 27 July, 2023 zan dar 8:00 khan Ignite Studio Khatla-ah, MZP General Headquarters, Aizawl buatsaih PMJVK Inter College Quiz 2023 kharna hun leh final match neih a ni a. He hun hi Pu Robert Romawia Royte, Sports & Youth Services Minister chuan khuallian niin a hmanpui. Quiz-ah hian Pachhunga University College chu pakhatna an ni.
Quiz kharna hunah hian khuallian chuan thu sawiin,"Sports Council leh MZP ten zirlaite tana Quiz hlawhtling tak in buatsaih thei hi lawmawm ka ti a. Zirlaiten he quiz avang hian thil thar tam tak inhriat ka ring a. Zirlaite hi thil hriat chian kawngah kan thanharh angai a, kan hriatna hi original se kan duh a. Kan thil hriatte mi sawia buai lovin kan source lakna dik se, hmasawnna dik tak kan zawh thei dawn a ni”. a ti . 

Pu Lalnunmawia Pautu MZP President pawhin thu sawiin,"MZP chuan Zirlaite leh ram leh hnam tan phak ang tawkin hma a la thin a. tunhnaia kan unau Manipur, Myanmar leh Bangladesh a mi ten harsatna an tawh mek hi kan hre reng a, kan unaute harsatna hi kan harsatna a ni a, kan unauten min mamawhna apiangah kan che zel dawn a ni a ti a. MZP President chuan Zirlaite hnama kan chian thar angai a,  Social Media hman kawngah kan fimkhur angai a, social media kaltlanga kan chet velnaah kan fimkhur leh zual angai a. Hnam dang nupui pasal nei lo tura ngaihtuahna kan sen thar angai a. Thu belhchian dawl lo buaipui lo tur leh thu rintlak a finfiahna awm ngei chauh buaipui turin zirlaite ka chah che u a ni.” a ti bawk.

MZP General Headquarters, Aizawl buatsaih PMJVK Inter College Quiz 2023-ah hian College 12 an tel a, chuta a titha College pathum ten nizanah intihsiakna an hmachhawn, Pachhunga University College chu pakhatna a ni a.Govt Hrangbana College chu pahnihna niin, Govt Serchhip College chu pathumna an ni. Pakhatna Pachhunga University College aiawha telte chu, F. Remsangpuia V-Semester Economics leh Felicia Lalhmuchhuaki, V-Semester, History te an ni a. F. Remsangpuia, Pachhung University College chu Best Quizzer ah puan a ni. 
Pakhatna hian, lawmman Rs. 40000/-,  Trophy leh thuziak an dawng a. Pahnihna hian lawmman Rs. 30000/-, Trophy leh thuziak  an dawng a. Pathumna hian Rs. 20000, Trophy leh thuziak an dawng bawk.

MZP chuan, Quiz buatsaih a nih theih nana Mizoram State Sports Council (MSSC) thawhpuinaah lawmthu a sawi tak meuh meuh a ni.


Sd/-
(H. LALTHUTHLUNGA ZATE)
Secretary i/c Publicity