Aizawl, 5 Nov 2023: Mizo Zirlai Pawl (MZP) General Headquarters chuan National Institute of Technology (NIT) leh National Institute of Electronics and Information Technology (NIELIT) chhunga harsatna awm hrang hrang te bawhzuiin hma a la a, a hmunah a enfiah a ni.

MZP chuan Ni 26th October, 2023 khan National Institute of Technology (NIT) a Teaching Staff leh Non - Teaching Staff te harsatna tawh bawhzuiin NIT Director Prof. S Sundar hmuh a ni a, Advertisement chhuah lo a hnalak a nih thu te leh Sum hman dan dik lo chungchang te sawipui a ni a. Harsatna awm mek te chinfel vat a nih theih nan a hma la vat turin hrilh a ni a, MZP chuan heng harsatna te hi a en zui zel dawn a ni.

Ni 2nd November, 2023 khan  National Institute of Electronics and Information Technology  (NIELIT) Aizawl-a zirlaite harsatna hrang hrang te bawhzuiin NIELIT Director in-charge T.Gunendra Singh chu a office-ah a hmu a, Director hi Zirlaite harsatna hrang hrang awmte chu a rang thei ang bera hmala turin MZP chuan a hrilh. Institute-ah inen hranna awm lo tura hma la turin hrilh a ni bawk.

Hemi bakah hian, Zirlaite harsatna sukiang tura MZP-in Students’ Union din tura a ngen angin, NIELIT Director chuan ni 17th November, 2023 ral hma ngei a din a nih theihna turin notification a tichhuak nghal a ni.