Mizo Zirlai Pawl (MZP) General Headquarters, Aizawl buatsaihin vawiin March 5, 2024 chawhnu dar 1 khan School Education Conference Hall Treasury Square-ah kum 1966 March 5-a Bomb hmanga Mizoram beih a nih champhaphak, 'Zoram Ni' hman a ni a, Home Minister Pu K. Sapdanga chuan khuallian niin a hmanpui.

He hunah MZP President Pu H. Lalthianghlima chuan thusawiin, "Ram leh hnamin hun harsa a tawh hi theihnghilh mai chi a ni lova, phuba lak tumna leh thinrim tharthawhna tur a ni lova, hnam anga tanrualna leh inpumkhatna ni atan i hmang ang u" tiin, "Zofate kan lo inlungrual a, kan inpumkhat hi kan hnam dinchhuahna tura thil pawimawh a ni" a ti.

MZP President chuan, "MZP chu zirlai pawl a nih angin, Zirna tihmasawn na tura hnathawh hrang hrangte ngun takin kan endik dawn a. A theih ang angin sawrkar kan thawhpui dawn a, thil dik loah chuan kan sawisel hreh dawn lo a ni" a ti bawk.

Khuallian Home Minister Pu K. Sapdanga chuan, "Mizo hnamin kan tawrhna hi theihnghilh chi a ni lova, MZP in a tha zawnga kumtin a hmang hi a lawmawm ka ti hle a. Jet Fighter hmanga Mizoram beih champhaphâk hi hnam hmangaih tharna a nih ngei ka beisei a ni" a ti a. "Khawvel hmun dangah pawh an ram leh hnamin harsatna an tawh ni hi a ?ha zawngin an hmang thin a. Japan rama America-in Hiroshima leh Nagasaki a bomb ni chu "World Peace Day" tia hman thin a ni" a ti bawk.

Kumin Zoram Ni thupui "Zofate insuihkhâwmna hmathlir" tih hman a ni a, Dr. Vanlalremruata Tonson Asst. Professor PUC-in Paper a buatsaih chu zir ho a ni a. Kalkhawmten an sawiho a ni.

He hun hi MZP Vice President Pu  C. Lalremruata'n a kaihruai a, Pu Ricky Lalbiakmawia, NESO Vice Chairman chuan hunserh a hmang a. MZP General Secretary Pu Chinkhanmanga Thomte chuan Zoram Ni hman chhoh dan report a pe.

He hunah hian MZP chhungkua bakah, ICFAI zirlaite leh Party leh NGO hrang hrang aiawhte an tel a ni.

       Zoram Ni thlalak en duhte tan.