Ni 29 May, 2025 (Ningani) chhun dar 12 khan MZP General Headquarters Executive Meeting vawi 643 (2023-2025 term-ah vawi 21) na chu MZP Conference Hall-ah an thukhawm a. Phuldungsei khua (Thaidawr tlang) pan chhohna a tun hnai a thil thleng chungchang leh pawl chhung thil pawimawh hrang hrang an rel. 

Meeting chuan, Mizoram chhung Phuldungsei khua Thaidawr tlang pan chhohna kawng sira, Tripura sawrkarin Forest Guest House an sak mek, tu tih hriat loh te'n ni 28 May, 2025 zing lam dar 2 leh dar 3 inkara bomb hmanga beih a nih chungchang a ngaihtuah a. Hetianga mi tu tih hriat loh te'n bomb hmanga Mizoram chhung an bei ta mai hi MZP chuan pawi a tiin a dem a, he thil thlenna hmun hi Mizoram chhung anih avangin, Mizoram sawrkar thuneitute'n a rang lama thil thlen dan chhui tur leh Tripura sawrkarin Forest Guest House an rawn sak mek hi remchanga laa titawp nghal turin a ngen a. Thaidawr tlang pannaah hian Mizoram Police duty dah ve nghal turin MZP chuan sawrkar thuneitute a ngen a ni.

Mizoram chhunga Tripura sawrkar-in Forest Guest House an sa ngawt mai leh, a bul lawkah Tripura State Rifle te an duty reng laia beih a ni hian, Mizoram state puh hmingchhiatna tura thiam taka ruahman a ni ang em tih MZP chuan a ngaihtuah a. Phuldungsei mipuite ti thlabartu leh Mizoram mualphona thlen thei thil a nih avan gin, thil thlen dan hi chhui chhuak vat turin MZP chuan Mizoram sawrkar a ngen a ni. 

MZP chuan, Thaidawr tlang chhehvela Tripura sawrkarin kut an rawn thlak reng chu a ngaimawh hle a, ni 16 April, 2025 (Nilaini) khan MZP President Pu H. Lalthianghlima hoin helai hmun hi an lo tlawh tawh a. Tripura sawrkar hmalakna chu a rang thei ang bera chawlhsan turin an lo hriattir tawh a ni.