19/5/2025:: MZP-in Sericulture Department hnuaia thawk tur, Sericulture Demonstrator post 4 hawhkhat tura hna lak danah thil diklo awm ngeia a hriat avangin, ni 13 May, 2025 khan thuchhuah a siam a. Hna lak dan chhui phutin, inquiry Committee din turin sawrkar an ngen a ni. MZP ngenna angin Sericulture Department chuan inquiry Committee a din nghal.

MZP chuan ni 13 May, 2025 (Thawhlehni) khan Sericulture Department hnuaia thawk tur Sericulture Demonstrator post 4 lak danah, thil dik lo taka kalpui niin a hria a. Examination Hall-ah Mobile Phone ken luh niin, Exam beitu thenkhat ten complaint mahse exam hi kaltlang luih pui niin an hria a. Hei hian The Mizoram Direct Recruitment (Conduct of Examination) Guidelines 2018; Sl. No. 24- Instruction to Candidate; Sl. No. 27- Dutes of Invigilator te a kalh ngeia a hriat avangin chhui a phut a. Inquiry Committee hi ni 21 May, 2025 ral hma ngeia din turin sawrkar an ngen a ni.
Sawrkar-in he hna lak dan dik tawk lo chhui chiang turin enquiry committee a din nghal chu MZP chuan lawmawm a ti hle a. Inquiry Committee tena an thil chhui leh an thil hmuhchhuah chu, nghâkhlel takin a thlir reng dawn a. Uluk takin an zirchiang leh dawn a ni.
Sawrkar-in Inquiry Committee-ah Department mi leh sa nilo, Department pawn lam mi an ruat chu lawmawm a ti hle a. Ni 30 chhungin report peih hman tura beisei an ni.
Sericulture Department hnuaia thawk tur Sericulture Demonstrator post 4 hi ni 17 February, 2025 khan Advertisement tihchhuah niin, Level 4 pay matrix a ni a. Mi 41 te dilna pawm niin, mi 14 te reject an ni. Mi 38 ten ni 8-9 April, 2025 chhung khan exam beiin, mi 32 te chu ni 7 May, 2025 khan Personal interview tura koh an ni a. Heng mite atangin mi 4 te chu thlan chhuah an ni a. Ni 8 May, 2025 khan appointment pek fel tawh an ni.
MZP chuan hetiang hna lak diklo sawi tur a awm fo thin chu pawi a ti takzet a. Hna lakah a thiam leh tlingte lak thin nise tih chu MZP duh dan a la ni reng a MZP chuan zirlai hna zawng mekte thlavang a hauhin hma a la zel dawn a ni.