MZP chuan Mizoram-in a remna leh muanna kan neih champhaphak vawi 39-na, "Remna Ni" 2025 lawm leh turin inbuatsaihna a kalpui mek a. June ni 30 (Thawhtanni) hian Lammual Aizawl-ah a hmang leh dawn a.

             He hunah hian Pu Lalduhoma Mizoram Chief Minister chu khuallian a ni ang a, Sikul hrang hrangin cheraw kanin, zai leh lam leh thusawina bakah lemchan te a awm ang a. Rev. Dr. Lalhmangaiha Council of Churches in Mizoram (CCM) General Secretary in hunserh a hmang ang.

             MZP chuan Mizo mipui zawng zawng he hun hmang tur hian a sawm a, sawrkar mi pawimawh, NGO hrang hrang, kohhran hrang hrang, zirna in zawng zawng leh Politicial Party tinte he hun hmang tur hian a sawm a ni.

             Remna kan neih hi kum 39 lai ral tawh mahse a hlutna a la ngai renga, kum 20 teh meuh hreawm leh harsa taka Mizo mipuite kan awm hnuah Mizo mipuite tawngtai chhuah a nih avangin, theih ang tawka lawm hi a phu a. Zirlaite phei chu a hlut zia leh Mizote hun pawimawh a nih zia kan inhrilh thar zel a tul takzet a ni.

             Remna Ni hi Mizo mipuite tana hun pawimawh em em, lungrual taka lawm ho tur ni mahse; a bik takin political party-te ngaihdan a inang lo fo a. Remna Ni-ah kan inhnial nasa thin hle a. Hun pawh kan hmang ho hlei thei lo a ni ber. Chuvangin MZP chuan hei hi a vei hle a, political party awn lam nei lo Zirlai pawl chuan kum 2018 atangin kumtin Remna Ni hi a buatsaih ta ziah a ni.

             MZP buatsaihna hnuaiah Party hrang hrangte pawhin lungrual takin hun kan hmang ho thei ta zel a. A hun laia Sawrkarna fawng chelhtu apiang an in ti neitu lo thei lo a. MZP chuan lawmawm a ti hle a. Hun lo kal zelah pawh Remna Ni hi Mizo mipuite. lungrual takin hmang ho zel thei ila tih hi a duhthusam a ni.

             MZP chuan Remna Ni-ah hian, Remna atana thawhhlawk mi hrang hrang a lo chawimawi tawh a. Chungte chu:-

            2018: Pu Lal Thanhawla, Pu Laldenga, Pu Lalkhama (IAS Retd.)

            2019: Rev. Dr. H.S. Luaia, Rev. Dr. Zairema, Rev. Dr. Lalngurauva Ralte, Pu Lalduhoma

            2022: Rev. Dr. Lalsawma

            2023: Mizoram Kohhran Hruaitute Committee

            2024: Pu J.H. Rothuama, Pu P. Lalupa, Pu Lalthanzauva, Pu Ngurchhina

             Kuminah erawh chuan chawimawina a pe chhuak dawn ta rih lo a. Hun lo kal zel turah erawh chuan la sem zel tura ruahman a ni.

             MZP chuan Remna Ni hi hetiang hian a lo hmang tawh:-

            2018- PUC Multipurpose Hall

            2019- Lammual

            2020- Ignite Studio, Khatla 

            2021- Covid avangin hman ani lo

            2022- Aijal Club

            2023- Vanapa Hall

            2024- LPS Arena

            2025- Lammual

            MZP chuan Zoram mipuite Remna Ni puala, Pathian hnena remna avanga lawmthu sawi tawngtaina nei theuh turin a ngen a. Hun hmanna Lammual-ah lo tel vek turin a sawm nghal che u a ni.