Vawiin ni 19 November, 2024 (Nilaini) khan MZP General Headquarters Executive Committee Meeting vawi 648-na neih a ni a. Meeting-ah hian Thangram Indigenous Cultural Meet 2026 chungchang, School result tha duh luat avanga Zirlai hnufual dropout chungchang leh Chawngte ‘P’-a Mizo ten Chakma kut an tawrh chungchangte rel a ni a, MZP in Students’ Aid Fund Guideline a siam chu pharh a ni bawk. Meeting hi Dr. C. Lalremruata President-in a kaihruai.

Meeting chuan School thenkhat Board exam result tha duh luat avanga Zirlai hnufual dropout an awm thin chu tha a tilo hle a. Zirlai hnufual, thiamtheilo leh chhawmdawl ngai tak takte chhawmdawla kaihruai tu tur zawk ten, School result tha duhna avang ringawta Zirlaite hma hun chhe tur ngaihtuah pui miah lova an hnawtchhuak thin leh School dang atanga Board Exam hmachhawn tura sawipui leh fuih an awm thin chu MZP chuan pawi a ti tak zet a. Hetiang ang harsatna tawk mek zirlaite chu MZP-ah in report turin MZP chuan a ngen a, Zirlaite harsatna chinfel pui turin MZP chu a inpeih reng a ni. Tin, hetiang ang harsatna hi Zirlaiten tawk tawh lo se a duh tak zet bawk.

Meeting chuan Chawngte ‘P’ –a Mizo leh Chakma inkhelhnaa buaina chhuakah Mizo ten Chakma kut an tuar chu MZP chuan a duh lo tak zet a. Mizoram chhungah Mizo ten hnamdang kut kan tuar leh thin chu pawi a ti a, Mizoram chhunga hnamdang chengte pawh fimkhur tur leh a ram neitu Mizo te chu zah turin MZP chuan a hriattir. Chawngte ‘P’ a thilthleng chungchang hi vawiin ni 19 November, 2025 (Nilaini) chawhnu khan MZP chuan Mizoram Chakma Student Union-te MZP PISAPUI-ah a sawipui.

Zirlai harsate tanpuina tur Students’ Aid Fund, MZP in a buatsaih chu vawiin khan Guideline pharh niin meeting chuan a pawm a. Students’ Aid Fund hi Mizo zirlaite, sum leh pai harsatna avanga zirna chhunzawm theilo te chhawmdawlna tur a ni ang. Tin, Students’ Aid Fund tlangzarh hun atan ni 10 December, 2025 (Nilaini) chu ruat a ni a, Chief Minister ho a tlangzarh tum a ni bawk.

MZP PISAPUI hi kumin atan ni 18 December, 2025 (Ningani) hian khar a ni anga, kum thar ni 12 January, 2026 (Thawhtanni) hian hawn leh a ni ang. PISA hi khar ni mahse ram leh hnam leh zirlaite chungchangah chuan dawr theih reng a ni.


(LALENTLINGA)

Asst. General Secretary

MZP General Headquarters