Vawiin ni 21 July, 2026 (Thawhlehni) chhun dar 12:00 khan, MZP General Headquarters Executive Committee Meeting vawi 653-na chu MZP Conference Hall-ah neih a ni a. Meeting-ah hian NEET-UG Exam Question Leak Out chungchang, Special Intensive Revision (SIR) chungchang, UG Gold Medalist chawimawi chungchang leh MZP rorelna sangber MZP Assembly 2026 neih tur chungchangte rel a ni a. Meeting hi Dr. C. Lalremruata President chuan a kaihhruai a ni.


MZP Executive meeting chuan, NEET-UG exam question paper leak out avanga India ram pum huapa zirlai tam takin harsatna an tawk leh mi tam takin nunna hial an chan chu pawi a ti a, he thil avang hian Mizo zirlai sang chuang fe pawhin an tuar ve bawk a ni. Queston leak out avanga harsatna thleng mek te demna leh hun lokal tura zirna kalphung felfai zawk a awm theihna turte, exam system thianghlim zawk a awm theihna tur leh zirlai rilru thianghlim tak tak ten’a hetiang thila harsatna tawk an awm tawh loh na turin MZP General Headquarters bul tumin Peaceful Protest ni 23 July, 2026 (Ningani) chawhma dar 11:00-ah Vanapa Hall kawtah neih a ni dawn a. Mizo mipui leh zirna ngai pawimawhtu te zawng zawng min telpui turin kan sawm a. MZP Headquarters leh Sub-Headquarters te pawh in mahni huamchhungah an remchan anga hma lo la ve turin kan hriattir nghal bawk a ni.


Meeting chuan, Election Commission of India in Mizoram-a Special Intensive Revision (SIR)-a kalpui mek chungchang chu ngun takin a ngaihtuah nawn a, Voters pun tam zualna khaw thenkhat-a hearing an neih hun-ah, a theih ang anga kalchih nise a ti a. Hei bakah hian ECI leh Mizoram Election thuneitute pawh a rang thei ang bera sawipui nise a ti a ni.


Meeting chuan Under Graduate (UG) Gold Medalist, MZP chhungkua, College Student’s Union (SU) leh Hnampual hruaitu zirnaa hlawhtlina changte lawmpuina chungchang chu rel tel bawkin ni 30 July, 2026 (Ningani) hian lawmpuina leh chawimawina neih nise a ti.

Tin, MZP rorelna sangber Assembly 2026 chu ni 23 - 25 September, 2026 chhunga neih turin a rel a. MZP Assembly thleng duh te tan Ni 31 July, 2026 ral hmain MZP Geaneral Headquarters-ah dilna thehluh tur a ni ang. Meeting chuan Assembly Organising Committee din nghalin chairman atan Pu Sanghmingthanga, Vice President leh Secretary atan Pu Lalentlinga, Asst. Gen. Secretary te a ruat nghal a ni.