Mizo Zirlai Pawl (MZP) General Headquarters, Aizawl chuan vawiin July ni 30 2026 (Ningani) chawhnu dar 12:30 khan I&PR Auditoruim,Treasury- ah Under Graduate(UG) Gold Medalist chawimawina leh MZP chhungkua, MZU SC, Students’ Bar Council, College SU, Hnampual hruaitu lawmpuina hun an hmang a, he hunah hian Food Civil Supplies & Consumer Affairs changtu Minister Pu B. Lalchhanzova chu Khuallian niin hun a hmanpui a, Gold Medalist mi 4, SU Rank holder 5 leh University leh College zirlai hruaitu hlawhtlinna chang mi 64 hnenah lawmpuina hlan an ni a, he hun hi Pu Sanghmingthanga Vice President, MZP Gen. Hqrs. chuan a kaihruai a ni.


MZP President Dr. C. Lalremruata chuan, Mizoram Govt. Adhoc Aided High School Teachers Association (MIGAHTA) ten an dinhmun ngai a awm phut a an nawrh mek thu sawiin, tuna school nuar mek ten nimin leh vawiin ah zirnain an khar avanga zirlai tam takin harsatna an tawh mek thu leh an harsatna sut kian anih vat theih nan sawrkar pawh hian hma la tur leh palai hna pawh MZP chuan thawh zel an in huam thu a sawi.

 Pu Remruata chuan, “Mizoram chhung leh pawnah pawh nise harsatna mizo ten kan neih chuan hma nasa taka an lak thin thu te, chung an thil that tih that hrang hrangte hre duh lova an thil tih dik loh pakhat vanga sawiselna tam tak awm thin chu tha a tih loh thu leh hruaitu hlui ten a ram leh hnam zirlaite tana thisen chhuak hial a lo beihna pawh zahawm hle a ni” a ti. Ram leh hnam in chhan angaihna apiangah Zoram mipui ten khawnge MZP an tih thin thu te, ramri buai, technical thil hrang hrang a zirlaite’n harsatna an tawhin, MZP a chet chhuah thin thu leh kum 90 zet MZP in a ram leh hnam zirlaite tana ke a penna kawngah tih dik tawklo leh tih fuh loh pawh a nei tawh ngei ang, chutihrualin kan ram tana thil tha tam tak alo tih tawhte hre reng turin zirlaite a chah.



 Election Commission of India in a Special Intensive Revision(SIR) a kalpui mek ah MZP chuan theihtawpin hma a la mek a, MZP hmalakna avanga 2005 ah pawh mi sing chuang paih an ni a, 2005 atangin 2026 thleng a zirchianna an neih ah mizo khua 100 zel a 15% chauh a an pun lain, Chakma khaw 50 chuangah chuan an punna chu 100 zel a 130 vel an nih daih thu sawiin, heti tak mai a an pung hi a mak hle a, thil dik lo a awm ngei a rin thu a sawi a. Sawrkar official thenkhat pawh an hna thawk tha theilo khawpin an ruih thin thu leh document diklo a mi tam tak lo luh tum awmin thu hriat a ni bawk a, chutiang thil a thlen chhunzawm loh nan SIR 2026 kalpui meka hma la tu official zawng zawngte chuan dik taka hmala turin a chah bawk.









Khuallian Pu B. Lalchhanzova, Minister of State chuan, MZP pawl hlu leh hlun tak, Mizo Zirlaite Inpui a nih ang taka chawimawina leh lawmpuina hun a buatsaih chu lawmawm a tih thu a sawi a. Minister chuan pawl ang emaw mimal ang pawhin, harsatna leh buaina tawh chiahin, kan nihna tak tak a lo lang thin tih tarlangin, chutiang harsatna tam tak lo pal tlang tawh leh ram leh hnam hmasawn nana huaisen taka lo kal tawh thin MZP chu entawna nei a, mahni hma zawna tihtur awmte theihtawp chhuah leh huaisen taka ti thin turin Zirlai kalkhawmte chu a chah a. Mahni zawn theuhva hma sawn zel turin mahni inhriat chian chu thil pawimawh ber pakhat a ni tih sawiin, inelna sang tawh tak khawvelah dam khaw chhuak ve tur chuan a nuam chin chauh piah lama kal ngamna te, nghen chhan neih loh ngamte chu hlawhtlinna kawng a ni tih hre reng turin a fuih bawk a. Hma lam huna an thil tumte chu lo khirh deuh pawh nise, tlawm mai lo va kal zel tura fuihin, hun khirhte chu ral leh mai tur an ni tih hre chung a, beidawng ve duh ngai lote chu an ding chang tho tho thin tih hre reng turin a chah a. Zirlai kalkhawmte chu an tobul, hnam nunphung leh chindan te ngaihlu fo tura chahin, chumi atana mahni zawn theuhva inbih chiang thin turin a sawm a. Chawimawina leh lawmpuina thilpek dawng zawng zawngte chu an kal zelna turah duhsakna a hlan nghal bawk a ni.

 

GOLD MEDALIST

1. Arts Stream: Julian Lalfakzuala (Economics Dept.) GovtHrangbana College

2. Science stream : Laltluangpuii Jongte (Physics Dept) Pachhunga University College

3. Social Work : David Lalrinsanga, Divine Mercy College

4. Home Science : R.S.Vanlalmalsawmi Govt.Zirtiri Residential Science College

 






COLLEGE SU RANK HOLDER:-

1. Jenny Lalremthiami, 1st Rank— (Sociology) Debating Secretary, TRC                           

2.  Lalchhanhimi, 7th Rank– (Sociology) Secretary, Debating & Literary, GAC

3. Biakthansanga Sailo, 2nd Rank– (BCA) General Secretary, GZRSC                                 

4. Rodingpuii, 3rd Rank–(LLB) President, Students Bar Council

5. Vanlalruata Jongte, 5th Rank–(LLB) Treasurer, Students Bar Council