Mizoram Home Secretary Pu Vanlalmawia, IAS kaihhruaina hnuaia vawiin September 16, 2026-a All Mizoram Petroleum Dealers Association (AMPEDA) leh Mizo Zirlai Pawl (MZP) hruaitute thukhawmin a rel angin, AMPEDA ten MZP laka an thilphutte an hnuhlet leh tak avang leh September 17-a Petrol Pump khar an tum tawh pawh an thulh leh tak avangin naktuk September 17, 2026- a Mizoram chhunga hnam dang  enkawl leh hnam dangte thawhna Petrol pump khar tura  MZP Headquarters, Sub-Headquarters, Branch leh Hnampual zirlai pawl a kan thawhpuite hnena  hriattirna  a lo tihchhuah tawh chu MZP chuan mipui hmakhaw ngai chungin a titawp rih a ni.

 

MZP chuan, Hnam dang Mizo hming hawh leh hnam dang (vai) sumdawng an rawn pung chho zel hi a vei tak zet a, MZP Assembly lo awm turah pawh, ”Mizo hming hawha hnam dang sumdawn tirte na taka hremna dan Sawrkarin siam se, a tul anga dap chhuah thin ni rawh se” tih chu rel tur zingah dah tel niin, a tul angin Assembly rorel bawhzui hian MZP chuan hnamdang sumdawngte dapchhuah kawngah hma ala chhunzawm dawn a ni.

 

MZP chuan, Mizoram leh hnam himna atan theihtawp a lo chhuah tawh thin a, kan ram kan hnam a him zel theihna turin hma a la chhunzawm zel dawn bawk a. Mizo mipuite pawh sum leh paia hlawkna ringawt um lova, kan ram himna leh kan hnam damna tur atan kan hming leh ram te hnamdang hawhtira, sumdawnna atan hman tir lo turin a ngen a. A tul anga dapchhuah kawngah Zoram mipuite thawhpuiah a sawm a, abik takin Village/Local Council leh tlawmngai pawl hrang hrangte a sawmin a ngen a ni. Tin, sumdawnna atana mahni hming hawh tir mekte pawh, ram leh hnam a lo him zawk theih nan hnamdang an thawhpuina titawp vek turin MZP chuan a ngen nghal bawk.