Vawiin ni 11th March,2019(Thawhtanni) chhun dar 12:00 khan MZP General headquarters executive meeting neih a ni. Meeting hi Tv. L. Ramdinliana Renthlei, President in a kaihhruai a. Meeting chuan, Bairabi, Zophai hmuna Zofate chawlhbuk sak chungchang, Sikul naupang tan chess-a in elna, College zirlaite tan hnamlam intihtihsiak leh Quiz intihsiakna neih nise tih rel a ni.

 Meeting chuan Bairabi Zophai hmunah MZP in Zofate Chawlhbuk sak a tum chu a la ngai reng a, MZP chu a dinna ngaiah a la ding reng a, Zofate Chawlhbuk hi sak chhunzawm leh turin a rel a ni. Ni 8 leh 10 March,2018 ah Bairabi Zophai hmuna Zofate Chawlhbuk sak tum tum a ni a, Assam Police nen innawr buaina avanga tun thlenga sak theih a ni ta rih lo a ni. Sorkar hmasa lakah MZP a bei dawn hnuin, Sorkar thar a lo pian hnuin MZP chuan beiseina sang tak a neih avangin Mizoram Sorkar thar a lo pian ve leh Chief Minister leh Home Minister bulah lehkha pek a nih bakah tawngka ngei pawhin vawi tam tak a sawipui a, Bairabi bialtu MLA pawh sawipui a ni tawh nghe nghe a ni. Assam leh Mizoram ramri enfel tu tur committee sang Core Committee pawh din thar leh turin ngen a ni a, tun thlenga ramri ngaihtuah tu tur Core Committee din thar a ni lo hi MZP chuan kan Sorkar hian ramri hi a vei lo hle ah a ngai a ni. 
MZP chuan Mizoram Sorkar chu zirlaiten vuak an tawrhna, Silai hial a kah an tawrhna leh thisen hial a luan tawhna Assam leh Mizoram ramri hi tun ai hian vei se a duh hle a, hemi chungchangah hian chak taka hma la turin Mizoram Sorkar chu a ngen nawn leh a ni. Tun March, 2019 thla chhung hian Bairabi, Zophai hmuna Zofate Chawlhbuk sakna tur enfel turin MZP chuan Bairabi, Zophai hmunah kal nise tiin a rel a ni. 

Meeting chuan, Thangtharteah hnam ziarang leh hlutna a tlakhniam zel avangin, kan hnam rohlu leh nun dan mawite chu vawnnun zel tha a ti a, thangthar zawk ten kan hnam lam ngei ngei pawh thiam mumal kan awmta mang loh avangin Mizoram pumhuap hnamlam intih siakna neih MZP chuan tha a ti a. Mizo hnam lam tuipui leh chawi vula a lo awmzel theih nan College zirlai zawng zawngte chu he in elnaah hian lo tel vek turin MZP chuan a sawm a ni. 

Meeting chuan, College zirlaite chu an zirna mai piahlamah hriatna zau zawk leh thiamna tak tak anneih theihna tur atan leh hmasawnna an neih nan Mizoram pum college zirliate tan Quiz competition buatsaih nise a ti a, he competition a tel tur hian college zirlai te lo inbuatsaiha lo tel vek turin MZP chuan a sawm nghal a ni.

Meeting chuan, Zirlai naupang zawk zirna mai piahlamah. Thluak tha tak tak an awm tih a hria a, chung mite chu an talent pho chhuahsakna atan leh an hun lo kalleh zel tur atan chona anneih theihna turin Mizoram pum a zirlai naupangte tan Chess competition siam nise a ti bawk a. Chess thiam leh tui zirlaite chu lo in buatsaih turin MZP chuan a sawmin lo tel vek turin a ngen nghal bawk. 

Sd/- 
(LALNUNMAWIA PAUTU) 
General Secretary