MZP chuan Mizoram a eirukna leh hlemhletna do tu tur The Mizoram Lok Ayukta Sorkar hmalakna a, a function thei dawn ta leh Chairperson hmasa ber atan Pu C. Lalsawta IAS(Rtd.) lakluh a ni ta hi lawmawm a ti hle a. The Mizoram Lok Ayukta function a nih theih nana hmala tu Mizoram Sorkar chungah MZP chuan thinlung takin lawmthu a sawi tak meuh meuh a ni. 

Mizoramah hian hun rei tak ata tawh hlemhletna (corruption) hian hmun a lo luah tawh a, a luah thuk hle tawh nghe nghe a ni. Hetiang taka keini ang ram rethei leh hmasawnna tur tam tak la neihna hmunah hlemhletna in nghet taka bu a khuar mai hi MZP chuan tha kan ti lo a, Corruption dona kawngah mimal leh pawl hrang hrang hma la tu awm bawk thin mahse duh ang thal a hmalak erawh a harsa hle thin tih MZP chuan a hria a. Hei hi a chhan bulpui ber chu hlemhletna (Corruption) do tu inpui chak tak a awm loh vang a ni tih MZP in a hriat chian em avangin ngaihtuahna nasa taka lo seng tawh thin a.

MZP chuan 13th April, 2012 khan Corruption chungchang zirhona 'Seminar on Anti-Corruption' chu I&PR Auditorium ah Corruption zirhona hun tha taka lo buatsaih tawh a. He seminar a sawitu tam zawkin corruption do tu tur Lokayukta din a tulzia nasa taka an sawi chu MZP chuan phur taka bawhzuiin Mizoram mai ni lo India ram pumpui a corruption huatna leh do na beihpui thlak a nih mek lai hian Mizoram ah pawh mipuite kan lo harh chho ve zel a, pawl leh mimal te pawhin corruption hi Zoram mipui ten nasa taka kan do a nih loh chuan do rem chi a ni lo tih hria in ram dang leh state dang te pawhin corruption do na atana tangkai taka an hman mek leh la hmang ve lo te pawhin hman a nih ve theih nana hma an lak mek zel a, 'Lokayukta' chu Mizoram ah hman anih ve theih nan 5th May, 2012 khan Lokayukta drafting committee chu MZP chuan NGO dangte sawmin a lo din tawh bawk.

Lokayukta Drafting Committee chuan Lokayukta chu Mizoramah rang taka hman anih ve ngei theih nan a hun laia Mizoram Chief Minister hnenah 20th May, 2013 khan ngenna a lo thehlut tawh a, pawl hrang hrang leh sorkar hmalakna zara eiruk do na tur leh eirute hrem theihna dan Lokayukta hman a ni dawn ta chu MZP chuan lawmawm a ti hle a. Lokayukta enkawl tura thawktute pawh ram leh hnam tana dik tak leh huai taka ding turin MZP chuan a ngen nghal bawk a ni.

   Sd/-
 (LALNUNMAWIA PAUTU)
 General Secretary