MZP PRESS RELEASE 

Vawiin ni 24th April 2019(Nilaini) chhun dar 12:00 khan MZP Executive committee meeting neih a ni a, meeting hi MZP President Tv. L. Ramdinliana Renthlei in a kaihruai a ni. Meeting-ah hian Mizoram Hindi Training College(MHTC) harsatna tawh mek chungchang te, HSLC 2019 exam zawh taka Mizo top-10 a langte chawimawina neih leh chungchang te, MZP Rorelna sang Federal Council Sitting Vawi 51-na Agenda tur thlifimna neih a ni. Tin, meeting-ah hian pawl hmalakna hrang hrang report ngaihthlakna hun neih nghal a ni bawk.  

Meeting-ah hian Mizoram Hindi Training College(MHTC) zirlaite harsatna tawh chungchang rel a ni a, Mizoram Hindi Training College(MHTC)-ah hian thil fel lo leh dik lo a awm ngei niin MZP chuan a hria a. Zirlaite hnena fee chi hrang hrang khawn te, a hman na tur ni lo a hman te, laboratory fee lak si lab practical te zirlaite neihpui an ni ngai lo a, kum tin study tour in Agra-ah an zin thin a study tour na sum leh pai zirlaite chanvo tur pek kim an ni ngai lo a, zirlai study tour a zin si lo zin anga sum lakchhuah te, zirlaite sum dawn tur pek kim loh thahnem tak a awm bawk a ni. Mizoram Hindi Training College(MHTC) zirlaite harsatna tawh mek hi thuneitu ten a rang lama chinfel sak a, mawhphurtu an awm ngei ni a hriat a ni a, mawhphurtu chunga dan anga action la thuai turin MZP chuan Sorkar thuneitute a ngen a ni. Mizoram Hindi Training College(MHTC) zirlaite harsatna hi chinfel thuai a nih theih nan leh mawhphurtu chunga dan anga hrem a nih theih nan MZP chuan hma a lak chhunzawm zel dawn a ni. 

Meeting chuan HSLC(Class-X) exam zawh taka Top-10 a Mizo tlingte chawimawina neih leh ngei ni se a ti a, MZP chuan kum tinin HSLC Top-10 a Mizo tlingte hi chawimawina a nei thin a, hei hian nasa takin Mizo zirlaite-ah a tha zawngin nghawng a nei a ni. Mizo zirlaite hian tun aiin zirna uar ila, kan ramah hnamdang ten sorkar hnasang an thawh a, min awp mai loh nan theihtawpchhuah leh zual turin zirlaite a beisei tlat bawk a ni. 

Meeting chuan 26th April 2019- a MZP rorelna sang MZP Federal Council Sitting Aizawl-a neih tura heng a hnuaia mite hi chhawpchhuah ni se tha kan ti a ni. 
1. Mizorama Schedule tribe list enfiah a siamthat a nih theih nan, MZP in hma la rawh se. 
2. Mizoram pumah Mobile Tower changtlung zawk a awm theihna turin MZP in hma lak ni rawh se. 
3. MBSE hnuaia zirlaibu-ah Zo-hnam ziarang thahnem zawk telh a nih theih nan MZP in hma la rawh se. 
4. Zirtirtu Transfer and Posting Rules mumal tak Mizoram Education Department in a neih theih nan MZP in hma la rawh se. 
5. Mizoram chhunga dan lo va lo lutte dapchhuak a, hrem an nih theih nan hma lak ni rawh se.

              
Sd/-
(H.LALTHIANGHLIMA)
 Asst. General Secretary