Latest Post

MZP IN PRIVATE SCHOOL FEE SANG UCHUAK NGAIMAWH | TUIKUKTE TANA SPECIAL POLLING BOOTH SIAM DUH LO

PRESS RELEASE

*MZP IN PRIVATE SCHOOL FEE SANG UCHUAK NGAIMAWH*

*TUIKUKTE TANA SPECIAL POLLING BOOTH SIAM DUH LO*

Vawiin 2nd April, 2019 (Thawhlehni) chhun dar 12:00 khan MZP General Headquarters Executive Meeting neih a ni a, Tv. L. Ramdinliana Renthlei, President chuan kaihruaiin, Meeting-ah hian January atanga March, 2019 chhunga zirtirtu transfer chungchang te, Tuikuk Special Polling Station pek tum chungchang te leh Gospel Centenary School fee sang lutuk chungchangte rel a ni.

Meeting chuan, Kum 2019-2020 School Session thar zirna in hrang hrangin an ṭan leh thei chu lawmawm a ti hle a. Chutih rualin Private School ṭhenkhatin Sorkar phalna bak Fee tam tak la an awm chu pawi a ti a, MZP chuan thuneitute hnenah pawh alo thlen tawh ṭhin a ni. Sorkar dan zah lova School neituten an duh dan dana fee hrang hrang a lakte chu zirchianga action la turin MZP chuan thuneitute a phut nawn leh a ni.
Tunhnaiah Gospel Centenary School, Mission veng ami chuan zilaite hnenah uchuak takin hetiang hian danlovin fee an la tih hriat a ni a,
1. Monthly fee - Rs. 2000/-
2. Jubilee fund - Rs. 30/-
3. Building fund - Rs. 200/-
4. Medicine - Rs. 120/-
5. Electric & Water - Rs. 150/-
_________________
     Total - Rs. 2500/-

MZP chuan uchuak taka fee lak hi ṭhalo a tih avangin Gospel Centenary School (GCS) neitute pawh sawipui a inremna neihpui a ni a, chumi hnuah he inremna hi zahlovin fee lak dan chu a ngai rengin an kalpui lui a, hetianga fee lak a nih zel chuan  School din phalna petute hnenah phalna tihtawp anih theihna turin MZP chuan hma a la dawn a ni. Tin, Mizoram chhunga School hrang hrangte chu zirlaite hnenah Sorkar rem tihna leh dan baka fee la lo turin a ngen nghal bawk a ni.

Meeting chuan, January-March, 2019 chhung hian Mizoram chhungah induhsakna avangin Sorkarin zirtirtu Primary school-ah Headmaster 30 leh Zirtirtu pangngai 40 leh Middle school-ah zirtirtu pangngai 21 lai mai thingtlang atanga khawpui chhungah sawn luh an nei chu hriatthiam har a ti hle a. Heng insawn te hi zirlai tam zawkna atangin, zirlai tlemna zawk leh zirtirtu tamna lamah an in sawn a. Hetiang anih avang hian thingtlang lam zirna In a zirlai naupangte chu a tuar nasa ber tur an ni a, MZP chuan a pawi ati takzet a, rang taka post ruak hi hnawhkhat nghal turin thuneitute a phut tlat a, Thingtlang atanga khawpui a zirtirtu transfer te post ruak hi Sorkar in a hnawhkhat thei dawn lo anih chuan heng zirtirtu thingtlang aṭanga khawpui lama sawn luh te hi anmahni awmna post ah dah kir leh nghal turin thuneitute MZP chuan a phut tlat a, an dinhmun hi MZP chuan a enzui in hma a la chhunzawm zel dawn a ni.

Meeting chuan kan hma lawk a Member of Parliament (MP) Lok Sabha thlanna lo awm turah anmahni duhthu ngei a Mizoram chhuahsantu Tuikuk Tripura Transit Camp-a awm te tan duhsak taka Election Commission of India(ECI) in Polling Booth Kanhmun khua Mizoram chhung ah a siamsak duh loh lan tir nan leh Mizoram chhung ngei a Electoral Roll-a an chuanna khua ah ngei vote thlak tir a nih theih nana NGO Coordination Committee in 8th April 2019 atanga tiamchin awm lo a Total Bandh Mizoram puma buatsaih a tum chu a thlawp tlat a, MZP  Headquarters, Sub-Headquarters, Branch leh Hnampual zirlai pawl a MZP thawhpui Mara Students' Organisation(MSO), Lai Students' Association(LSA), Hmar Students' Association(HSA), Mizoram Bawm Students' Association(MBSA), Siamsinpawlpi(SSPP), Pang Zirlai Pawl(PZP), Thado Kuki Students' Union(TKSU), Ranglong Students' Union(RSU) te leh University leh College lama MZP thawhpui Students' Union Leader zawng zawng te chu NGO dang nen  thawk ho a hma lo la  turin a ngen nghal bawk a ni.

Mizo Zirlai Pawl(MZP) General Headquarters, Aizawl chuan Mizo zirlai zawng zawng te chu NGO Coordination Committee hmalakna hi ram leh hnam tan a ni tih hria a, kan awmna hmun theuh a theihtawp chhuah a hma lo la turin a ngen nghal bawk a ni.




                   Sd/-
 (LALNUNMAWIA PAUTU)
General Secretary