-David Lalrinchhana
(Ex-officio,MZP Gen.Hqtrs)
Ph: 9774441940

A hmasain, MZP General Headquarters a kan hruaitute, MZP Sub - Headquarters E.Lungdar leh Khawtlang Nu leh Pa te, zirlai lo kal te in zavaiin chibai ka buk a che u.



Hmanni lawkah Pawl 10 leh 12 result a chhuak a, zirlai hlawhtling tam tak kan awm a, percentage- pawh a tha a, chawimawina nei tura Programme kan siam theih chhan chu tha taka pass-te  vang a ni a, he chawimawina hian zirlaite ah chona a pek leh zel kan beisei a ni.

First Division chin chawimawina siam a ni a, kumtin hian naupang hi chawimawi tur lo pung zel u la, hei aia tam chawimawi tur hi lo chhuak zel sela tih hi ka duh ber a ni. An hlawhtlinna te hriaa lawmpuina hun siamtu E.Lungdar MZP-te program buatsaih hi a lawmawm ka ti hle a, ziralite pawh in vannei hle a ni. Zirlai nitawh vek kan ni a, kei ngei pawh board exam lo hmachhawn  tawh thin ka ni. Class 12 kan nih te khan Board exam tur ka ni dawn tih hria in theihtawpin ka in buatsaiha, result chhuah dawn te phei chuan ka nervous thei hle a ni, Pathian hian mi taima te hi mal a sawm thin a, keipawh tihtakzeta  ka beihna mal min sawm a ni. Abikin Pawl 10 leh Pawl-12 result chu Mizoram hian kan ngaihven a, Pawl 10 phei chu zirna kailawn hmasa ber pawl a ni a, result a chhuah pawhin kan khuate pawh kan lo ngaihven vat thin a, Pawl 12 pass hnuah pawh duhtawk mai lovin, "Bul tan that hi chanve zo ang a ni" an tih angin nakin zelah theihtawp chhuah turin kan in ngen a ni.

Kan sawi hmaih loh tur chu kan zirtirtu te hi an ni. Facilities neitha an ni lo va, thingtlang atanga hetiang dinhmun kan nei hi a ropui khawp mai! Khawpui kan el pha tawh hi a ropui a, Tin, top 10 ah pawh result kan en chuan Aizawl ringawt a ni tawh lo a, khaw hrang hrangte an lang nuk tawh a nih kha, keini pawh hian kan thei a ni tih kan hriat a tha a ni.

Vawiina lo kalte hi Middle atanga Higher-te kan ni tlangpuia, kan ngaihtuah a in ang lo khawp ang a, tuna in zirlai tha taka taihmak na nena in zir chuan hlawhtlinna in la chang dawn a ni.

Pawimawh ka tih chu, kan talent-dawn a in ang lova, a then zirnnaah an thiam thei a, thenkhat thiamthei lo deuhte, a then chu tuina te a in ang lo va, Lo neih leh electronic te mistiri lamah te in tui thei a ni. Engpawh lo tui ula, eizawn nana hmang tlak in lo hlawhtling ula a tha a ni. Rual elna chang kan hre chho zela, taihmakna a pawimawh angin tumruhna a pawimawh a, kan khawsak harsa deuh mahse, tum a ruh tlat chuan nakina dinhmun thaa dah thei tu che u chu tumruhna a ni.


Tin, tum fum fe, tum bul bal tha tak neih tur a ni a, vai ho kan hria, civil service an tum anih chuan naupangte an nih atangin an in puahchah tawh thin a ni. In tui zawng te kha haichhuak thiam ula, zirtirtu pawhin zirlaite an tuina hriat tum ila, in hrem leh in hauh vak vak nilovin, a fuih zawnga inkaihhruai a tha a ni.

A dawt lehah chuan Pathian a pawimawh a, TV -a mihlawhtling an kawm kan hmuh pawhin Pathian tih a hlawk zia an sawi kan hria anga, Pathian ring chunga engkim tih zel a tha a ni. Pawl 12 ka pass kum hian ka Pu hian, "Tun atanga kum 5/6 ah i dinhmun tur a lang a nga, tunah thenkhat chu lén te, nawmchen te an ti nasa a, nangchu kum 5-6 hi insum hram hram la, a hnua i nawmna tur a ni" a tih kha ka rilru ah a cham reng a, tun dinhmun hi ka lo thleng ta a, tunah nangni pawh reilote in insum a, thianten len an sawm che u pawha in insum tlat chuan in hmalam hun atan kawng in lo sial lawk tih hria u la, hlawhtlinna chang turin insum hmasak kha a tha a ni.

Tin, pass tharte, zirlai lo kal te pawh keiin puih theih na che u ka neih chuan ka inhuam renga, civil service pawh nise, in hmalam hun atana zirna kawng zawh dan kawng te min rawn duh tan phone emaw Office ah pawh zawh theih reng ka ni tih ka sawi duh a ni e.

Ka lawm e.