MZP PRESS RELEASE

Vawiin June ni 18, 2019 chhun dar 12:00 khan MZP General Heahquarters chuan Executive Meeting MZP Conference Hall-ah an hmang a, Meeting hi Tv. L. Ramdinliana Renthlei, President-in a kaihruai. Meeting-ah hian Remna Ni hman dan tur chungchang, Mizoram - Assam ramri chungchang te leh pawl chhung thil pawimawh chi hrang hrang te rel a ni.

MZP General Headquarters chuan Remna Ni chu Aizawl Sipai Lammualah ropui takin hman a tum a, June ni 30, 2019 hi Pathianni a nih avangin June ni 28, 2019 (Zirtawpni) hian MZP chuan a hmang dawn a ni. He hunah hian zirlai ten Cheraw leh Custome parade an entir dawn a, Pu Zoramthanga, Chief Minister chu khuallian tura beisei a ni bawk.

Kan ramin Remna a neih hi a hlutzia ṭhangthar zelte hian kan theihnghilh mai MZP chuan a hlau hle a, hrehawmna leh tawrhna namen lo ram pumin kan tawrh hnua he remna hi nei kan ni tih hi kan in hrilh thar fo a ngaiin MZP chuan a hria a, ṭhangtharte thinlungah ram leh hnam hmangaihna tuh thara a awm zel hi MZP chuan REMNA NI-ah hian a thupui ber leh ropui taka he ni hi lawm a duh chhan chu a ni.

Remna a awm theihna atana tha thawhtu mi ṭhahnem tak kan awm a, ṭum khatah chawimawi vek sen pawh a ni awm lo ve. Tun ṭumah hian remna leh muanna kan neih theihna atana thawh hlawk em em mi pali chawimawi ni se tia rel a ni a, anni bak pawh hi chawimawi tur tam tak an la awm ang tih ring chungin heng mite hi tun ṭuma chawimawi tura thlan chhuahte an ni.

1) Pu Lalduhoma, MLA
2) Rev. Dr. Zairema
3) Rev. HS. Luaia
4) Rev. Dr. Lalngurauva Ralte

Remna Ni hmanna-ah hian Aizawl khawpui chhunga High School leh Higher Secondary School zawng zawngte School Education Directorate aṭangin kal phalsak an ni a. MZP-in Remna Ni a hman turah hian Aizawl khawpui chhunga High School leh Higher Secondary School zirlaite leh zirtirtute kal vek turin MZP chuan a ngen a, zirlai leh zirtirtu kal phalsakna min petu School Education Department Minister Pu Lalchhandama Ralte leh a thawhpuite chungah MZP chuan lawmthu a sawi tak meuh a ni.

MZP Executive Meeting chuan Mizoram - Assam ramri chungchang chu a ngaihtuah a, Mizoram Sorkarin chak zawka hma a lak theihna turin MZP chuan theihtawp chhuah a tum a. MZP chuan Mizoram leh Assam ramri ching fel tura Mizoram Sorkar hmalakna chu beitham a ti hle a, tun aia nasa zawka hma la turin Mizoram Sorkar chu a phut nawn leh a ni. MZP chuan Zofate Chawlhbuk kan sak avanga Assam police-in kut an thlak Mizo chanchinbu mite, Assam Human Rights Commission, Guwahati-a zuk inlan te chu a chhuang hle a, MZP chu Mizo chanchinbu mite hnungah a ding reng a ni. Mizo chanchinbu mite hi kan ram leh hnam tana ding an ni a, an kal lehzelna turah pawh MZP chuan a thlawp tlat a, Mizoram Sorkar pawh a ṭul ang apiang leh puih an ngaihna apiangah lo buaipui turin MZP chuan a ngen nghal bawk a ni.

     

       Sd/-
(H. LALTHIANGHLIMA)
Asst. General Secretary