Latest Post

HNAM DANG KAWPPUI NEI LO TURA INZIRTIRNA HMANG DAWN

PRESS RELEASE

Vawiin ni 20th August,2019(Thawhlehni) chhun dar 12:00 khan MZP Executive Committee Meeting neih a ni a. Meeting-ah hian MZP in kum tin Ni 2nd September apianga a lo hman thin, Hnamdang nupui/pasal neilo tura inzirtirna neih chungchang te, Ni 5th September 2019(Teachers Day) hman dan tur leh High/Higher Secondary School tan Mizo infiamna buatsaih chungchangte rel a ni a, Meeting hi Tv. L. Ramdinliana Renthlei, President chuan a kaihruai a ni.

Meeting chuan MZP ten kum tin 2nd September, apianga an lo hman thin hnamdang nupui/pasal neilo tura inzirtirna chu kuminah pawh hian hman leh ngei nise tha a ti a, MZP chuan Mizoram chhungah Zohnahthlak nilo hnamdang tam tak an awm tih a hria a. Zofate pawhin hnam anga kan lo din chhuah ve theihna turin keimahni hnam pui ngei neih hi MZP duh dan leh ngaihdan anih angin, Hnamdang nupui/pasal neilo tura inzirtrirna hi MZP chuan kalpui zel tha a tih angin, Kumin ni 2nd September,2019 ah pawh hian Aizawl khawpui chhung zirna in hrang hrangah Hnamdang nupui/pasal nei lo tura inzirtirna neih nise tia rel a ni.

Meeting chuan, Ni 5th September,2019 Zirtirtute Ni chu ropui taka hman leh nise tha a ti a. MZP in kum dangah pawh Teachers Day hi ropui takin a lo hmang tawh thin a. Zirtirtute hi hnam tana mi tangkai mihring puitling tura zirtirna kawh hmuh tu an ni a, thiamna leh finna mai piah lamah nunphung zirtirtu an ni bawk. MZP ten kum danga an lo tih thin tawh angin, zirtirtu tha National/State Awardee te chu chawimawina hlan leh ngei nise, tih rel a ni bawk a ni.

Meeting chuan, tunlai khawvel changkanna leh thang mekah Mizo naupang ten kan Mizo infiamna leh nundan phung kan hre tawh lo lutuk chu vei awm a ti hle a. Thangthar ten  mahni hnam nundan leh kalphung hre lo a changkanna in kan hnam culture hnawla kan hlamchhiah anih chuan kan hnam tan a him lo a ni tih MZP in a hriat avangin, Mizoram Indigenous Games Association(MIGA) te nen tangkawpin High School leh Higher Secondary School zirlaite tan Mizo infiamna chi hrang hrang hmangin inelna buatsaih nise tiin a rel a, Mizo infiamna chi hrang hrang hmanga inelna nei turin Mizoram chhunga High School leh Higher Secondary School tin te lo inbuatsaih lawk turin kan ngen nghal bawk a ni.


Sd/-
(LALRUATFELA)
Secretary i/c Publicity