Latest Post

MIZORAM STATE INHUNGBIKNA ZIRCHIANNA

Vawiin 12th August,2019 (Thawhṭanni) chawhnu dar 1:00 pm khan Aijal Club-ah Mizo Zirlai Pawl (MZP) buatsaihin "Mizoram State Inhungbikna Zirchianna" hun hman a ni a. He hun hi Pu B.Vanlaltana, Vice President-in kaihruaiin Tv. L.Ramdinliana Renthlei, President in thu tawi sawina hun a hmang bawk.

He hunah hian Pu Lalkhama, IAS(Retd) hnen aṭangin  Article 371 G chungchang a paper buatsaih ngaihthlak a ni a. Pu T.Lalnunsiama, Legal Adviser, MZP hnen aṭang ILP chungchang ngaihthlak a niin, Tv. Lalhmachhuana, General Secretary, CYMA hnen aṭangin CAB 2016 chungchang paper present ṭha tak ngaihthlak a ni bawk a ni.

He huna thusawitu Tv. L.Ramdinliana Renthlei, MZP President chuan "Indian Parliament chuan Kashmir mipuite'n an hlauhthawn em em ṭhin, India danpuiin Jammu & Kashmir State tana hlawkna hrang hrang petu leh an state inhumhimna/inhungbikna petu, Article 370 leh Article 35(A)-te thiatin Union Teritory pahnih an siam a, Ladakh leh J&K-ah a then ta a. Keini Mizoram State pawh hian India danpui hnuaiah hian hlawkna hrang hrang minpetu leh inhumhimna/inhungbikna ṭha tak Article 371G leh Inner Line Regulation/Permit (ILP) te kan nei ve a. Heng kan State inhungbikna te hi Mizo mipuite hian kan hrechiang tawk lo hle a, chiang lehzuala kan hriat theih nan inzirtirna kan mamawh hle a, hemi a nih avang hian kan state inhumhimna chungchang zirchianna buatsaih kan ni."a ti a.

L. Ramdinliana Renthlei chuan, "Vawiin hian mi thenkhat chuan Mizote hi hlauh kan ngah lutuk a, kan hnam chimral te kan hlau a, hlauh i ngah lutuk lo ang u an ti ṭhin a, dik viau anga lang, mahse, dik si lo a ni. Kan hnam, Mizo hi chu a ral lo a ni mai thei a, kan nunphungte, kan tlawmngaihnate, kan hnam kan hmangaih dan hi a ral ve tial tialin a hriat a ni. Hnam tlem kan ni a, kan hnam tan chuan kan thikthu pawh hi kan la tihchhiat tlat reng hi a ngai a ni. Vawiina Mizoram State inhungbikna/ inhumhimna chungchang-a inrawnkhawmna in a entir leh inrawnkhawm a ngaihna chhan nia ka hriat chu kan in hungbikna Article 371 G/ILP hi a nghing a ni tih a entir in ka hria. Keini ho hian kan ram leh hnam a chhe zawnga ei chhetu leh a dotu a piang hneh theih turin lungrual taka ke kan pen ho zel a a ngai dawn a ni." a ti bawk.

He zirchianna hunah hian NGO hruaitu te,  Political Party hruaitute bakah mithiam tak takte an kal khawm a. Sawihona hun ṭha tak siam niin kalkhawmte'n hlawkthlak an ti hle. 

Kalkhawm te hian resolution pahnih lungrual takin an passed a, chungte chu :

  1. Indian Constitution hnuaia Mizoram State Inhumhimna/Inhungbikna Article 371G leh Inner Line Regulation/ILP nuaibo emaw ṭhiah tumna a awm a nih chuan nuaibo/thiah a nih loh nan lungrual taka hmalak ho zel nise ṭha kan ti.
  2. The Citizenship Amendment Bill, 2016 hi Sawrkar laipuiin kal tlang pui a tum a nih chuan lungrual tak a do ho zel nise tha kan ti.

(LALRUATFELA)
Secy I/c Publicity