MZP PRESS RELEASE
1st September 2019

Nimin ni 31.8.2019 chawhnu dar 3 khan MZP chuan Home Minister Pu Lalchamliana chu a chenna In ah an kawm a, Assam National Register of Citizen(NRC) final list a tih chhuah chungchang a Mizoram lo inven dan tur chungchang te, Tripura ICFAI University a Mizo zirlaite harsatna chungchang te leh Mizoram-Assam ramri chungchang te sawipui a ni.

MZP chuan nimin inrinni 31.8.2019 chawhma dar 10 a Assam Sorkar in National Register of Citizen (NRC) final list a tih chhuah avangin Mizoram ah hnamdang thahnem tak an lo lut ngei dawn in a hria a. Nikum lama NRC draft list Assam in a tih chhuah pawh khan hnamdang thahnem tak Mizoram chhung a an lo luh thu te, Mizoram a an lo tlan chhiat loh nana Sorkar lo inven a ngaih thu te an sawi a. Home Minister Pu Lalchamliana chuan Chief Secretary Pu Lalnunmawia Chuaungo be nghal in, Mizoram leh Assam ramri police check post ah tun aia uluk leh zual a duty turin leh atul a nih chuan police dah belh a nih theih nan hma lo la turin a hrilh nghal a, ILP dil thar Assam atanga lo kal an awm pawhin Assam NRC nei lo chu ILP emaw temporary permit pawh pechhuak tawh lo turin District tina ILP lam khawih tute lo hriattir turin a hrilh nghal a. Pu Lalchamliana chuan "Assam leh Mizoram inrina laiah police check post hrang hrang tih chang tlun kan tum mek a, hemi tur hian Sorkar in chak takin hma a la a ni. ILP check apiangin Assam NRC hi demand tel ziah a ni tawh dawn a, Mizoram Sorkar chu hemi lakah hian uluk taka lo inveng turin a inbuatsaih mek a ni." a ti.

MZP chuan Home Minister Pu Lalchamliana hnenah hian tun hnai a Tripura ICFAI University a Bengali leh Tribal zirlaite inkara buaina awm chungchang a Mizo zirlaite harsatna leh manganna chungchang chu sawipui a ni a. Home Minister Pu Lalchamliana chuan, Tripura ICFAI a Mizo zirlaite harsatna leh buaina tawh chungchang chu a lo hriat tawh thu leh Mizo police officer te pawhin zirlaite an biak tawh thu te, atul chuan Mizo police officer te Mizo zirlaite la chhuak tura kal tura a lo tih tawh thu te a sawi a ni. MZP chuan state pawn a Mizo zirlaite harsatna leh buaina hria Home Minister kan nei hi a chungah thinlung takin lawmthu a sawi tak meuh meuh a ni.

MZP chuan Mizoram-Assam ramri chungchang Home Minister Pu Lalchamliana hi an sawipui bawk a. Home Minister Pu Lalchamliana chuan Mizoram-Assam ramri chungchang ah hian Mizoram Sorkar chuan theihtawp chhuah in hma a la zel dawn a, Mizoram-Asaam ramri chungchang ngaihtuah tu tur Core Committee in ngun takin a ngaihtuah zel dawn a, hemi chungchang ah hian theihtawp kan chhuah zel dawn a ni, a ti bawk.

          S/d
(LALRUATFELA)
Secy I/c Publicity