Latest Post

NDA tling thar leh Zirtirtu National leh State awardee te chawimawina hlan

No. E-93/MZP-GHQ/2021-2023/07           Dated, Aizawl, the 10th December, 2021

MZP PRESS RELEASE

Vawiin ni 10 December, 2021 (Zirtawpni) chawhma dar 11 khan kum 2021 atan MZP Pisapui kharna hun MZP Conference Hall-ah neih a ni. He hunah hian National leh State Award for Teacher leh Mizo National Defence Academy (NDA) a tling tharte chawimawina hun hman a ni a. Pu Lalnunmawia Chuaungo, Chief Information Commissioner chuan khuallian niin he hun hi a hmanpui. 

Pu Lalnunmawia Pautu MZP President chuan thu sawiin, "Mizote ti hmingṭha a, chawimawi tlak leh phute chu MZP chuan a chawimawi ṭhin a, chutih rualin ram leh hnam tan do ngai chu a do mai ṭhin a ni. Vawiina kan chawimawite hi MZP chuan kan hre reng dawn che u a, kan en zui reng dawn che u a ni" a ti.

MZP President chuan, "Zofa hmun hrang hranga awmte tan MZP in theihtawp a chhuah ṭhin a. Tuna Assam state huam chhunga awm mek, Mizoram-a rin luh phuta hmala mektu Thangram Indigenious People Movement hruaitute hmalakna hi MZP chuan a thlawp tlat a. Mizo mipuite pawhin theihtawp chhuahin i tanpui ang u" a ti.

MZP president chuan, kum thara zirlai pawl 10 leh 12 exam hmachhawn turte chu hunpui lo thleng tur hmang fimkhur turin a chah a, ram leh hnam nghahfak an ni tih in hre renga rilru leh tihtak zeta an zirlai zir turin a chah bawk.

Khuallian Pu Lalnunmawia Chuaungo, Chief Information Commissioner pawhin thu sawiin, "Zirna hi ram leh hnam hmasawnna atana inchherchhuahna pawimawh ber a ni a, uar lehzuala zirna kan kalpui a ngai" a ti a. "Vawiina chawimawina dawng zawng zawngte ka lawmpui em em che u rualin, mi dang tana entawn tlak ni zel turin leh Mizoram tithangmawitu ni zel turin duhsakna ka hlan che u a ni" a ti. 

MZP chuan NDA tling thar; Dayne Thiamsangliana S/o Lalhmingsanga leh Lalrindika S/o Dr. Lalrohlua. National Award to Teacher Pi Jacinta Vanlalengzami A&M Grandchild School, N. Vanlaiphai. State Award to Teacher Pu C. Lalhluna Headmaster, Govt. Bethlehem Vengthlang H.S, Pu Rosangzuala Ralte Headmaster, Govt. Edenthar M.S leh Pi Vanlathangi Headmaster, Govt. Electric P.S-II, Lunglei te hnenah chawimawina thuziak a hlan.

MZP pisapui hi kumin atan khar ni mahse, zirlaite leh ram leh hnam tan engtiklai pawin hawn theih reng a ni a. Kum thar ni 13 January, 2022 (Ningani) hian MZP pisapui hi hawn leh a ni ang. 


Sd/-
(CHINKHANMANGA THOMTE)
Asst. General Secretary