MZP PRESS RELEASE

Mizo Zirlai Pawl (MZP) General Headquarters-in, Mizoram Subordinate Services Selection Board (MSSSB) chairman bâng tura a nawrna chungchangah sorkar hotute nen inbiakna neih leh a nih hnuin tihtawp a ni.  

MZP chuan MSSSB hnuaia hna hrang hrang lâkah, thiamna inangah Zofate chanvo humhalh a, a tling leh tlâk (qualified) an awm phawt chuan hnam dang aia duhsak hmasa turin MSSSB hotute a lo ngen tawh a. MZP ngenna ti hlawhtling lo a, tunhnai a, MSSSB-in hna a lâkah, hnam dang pathum ngawt lak an nih leh avânga MSSSB chairman chu he thila mawhphurtu leh hnam tana ding tawk loah ngai a, sorkar thuneitute hnena January thla chhung ngeia thlak tura ngiatin lungawilohna lantir a ni a.

Hemi chungchangah hian sorkar thuneitute chuan MZP hruaitute hnenah ngenna hrang hrang a thlen a. Sorkar thuneitute ngenna hi February ni 2, 2023 chhun dar 12:30-ah MZP hruaitute, College SU hruaitute leh Hnampual zirlai pawl hruaitute chuan Emergency Meeting neia ngun taka a ngaihtuah hnuah, MSSSB Chairman bân ngiata hmalakna chu tihtawp a ni ta a, naktuk Zirtawpnia kawngzawh huaihawt tum pawh ṭhulh nghal a ni.

Sorkar thuneituten MZP hruaitute hnena an ngennate chu :

1. MSSSB-in Asst. Grade a lâk chungchangah Chairman, MSSSB hi February ni 6, 2023 hmaa insawifiahna thehlut tura hriattir a ni ang.

2. Assistant Grade Exam chungchangah thil felhlel a awm leh awm loh chhui chiang turin DP & AR (GSW) in enquiry a ti nghal ang a,February ni 8, 2023 aia tlai loah report hi theh luh tur a ni ang.

3. Ram leilung fate tân, dan hnuaiah tun aia him leh felfai zâwkin direct recruitment rules nei tura hmalak a ni ang.

4. February, 2023 chhungin result tih chhuah leh interview reng reng conduct a ni lo ang.

5. February ni 3, 2023 aia tlai loah MSSSB Chairman post hi vacancy circular tih chhuah a ni ang. 

MZP chuan Mizo zirlaite leh hnam himna atana inpekna rilru pu a, kan hmalakna min thlawptu zirlai zawng zawngte chungah lawmthu a sawi a ni.

Sd/-
(JACOB LALMUANPUIA)
General Secretary

No. E-93/MZP-GHQ/2021-2023/85 Dated: Aizawl, the 2nd February, 2023