No. E-93/MZP-GHQ/2021-2023/95             Dated, Aizawl, the 29th March, 2023


MZP PRESS RELEASE


Nimin ni 28th March, 2023 (Thawhlehni) tlai dar 3 khan MZP General Headquarters chuan Zo Hnam inkhawmpui lian Zofest 2018 Reiek a neih tawh hriatrengna lungphun a hawng a. Lungphun hi Pu C. Lalrokhuma MZP Ex President (2003-2005) chuan ribbon chep chatin a hawng. 

MZP chuan kum 2002 atang khan Zofate kan insuihkhawm theih nan leh khawvel hmun hrang hranga Zofate kan inpawh lehzual theih nan, Zo hnam inkawmpui lian Zofest chu a lo buatsaih tawh thin a. Zofest hmasa ber 2002 chu Churachandpur (Manipur)-ah neih niin, Aizawl (Mizoram), Darchawi (Tripura), Haflong (Assam), Zokhawthar (Mizoram), Reiek (Mizoram) leh Sialsuk (Mizoram)-ah te neih a lo ni tawh a. Zofest hian Zofate inkarah inunauna tha tak a siam a, rah tha tak a chhuah mek zel a ni. 

Heng Zofest neih tawhna hmunahte hian Zofest hriatrengna lung phun chhuah vek nise tia Meeting-in a lo rel tawh angin, Sialsuk-ah leh Reiek-ah te hian lung hi phun a ni tawh a. Hmun dang pawh hun remchang hmasa berah phun zel tura hmalak mek a ni. 

Nimina Reiek a ZOFEST 2018 hriatrengna lungphun hawnnaah hian, a hawngtu Pu C. Lalrokhuma chuan thu sawiin, “MZP chuan Zofate mamawhna zawn zelah hma a la thin a, hun hmasa lamah Zirna leh thu leh hla tihhmasawn a nih theih nan ke a lo pen tawh a, remna leh muanna a awm theih nan a thawhhlawk hle bawk. Ram leh hnam tan ke a pen chho zel a, Zofate kan insuihkhawm theih nan hma a la chho leh a, rah duhawm tak a chhuah mek zel a ni” a ti. “MZP chu kan unaute tan a ding tlat thin a, harsatna leh manganna an tawhin an tan kan awm thin, tunah pawh hian kan unaute tan kan ding tlat tur a ni. Ram hmasawnna (development) aiin kan ram leh hnam himna kan ngaihpawimawh hmasak fo loh chuan kan ram hi a ngaihtuahawm hle ang, chu chu khawvel hnam dangte ralna bul a ni” tiin kalkhawmte a fuih a ni.

MZP President Pu Lalnunmawia Pautu pawhin thu sawin, “Kan duh reng vang ni loa, khawvel hmun hrang hranga thendarh Zofate, kan in unauna a lo that lehzual theih nan MZP in Zofest a buatsaih thin a. Hei hi nakin zelah hriatreng a nih zel theih nan Zofest neih tawhna hmunahte hian a hriatrengna lung phun kan ni” a ti.

ZOFEST hriatrengna lungphun hawnna hun hi Pu H. Hrangkunga NESO Council Member-in a kaihruai a ni. 



                                                                            (CHINKHANMANGA THOMTE)
                                                                                Asst. General Secretary