No. E-93/MZP-GHQ/2021-2023/94               Dated, Aizawl, the 21st March, 2023

MZP PRESS RELEASE

Vawiin ni 21st March, 2023 (Thawhlehni) chawhnu dar 1 khan MZP chuan Pu Andrew F Lalramnghaka Vice President hoin Mizoram Lokayukta Chairman Pu C. Lalsawta IAS (Retd.) chu a office-ah an hmu a. Mizoram a eirukna dona tura din Mizoram Lokayukta dinhmun leh a kalhmang an enfiah a. An harsatna hrang hrangte an sawipui.

Mizoram a eirukna dona tura din Mizoram Lokayukta chuan, tun dinhmunah beisei a phak lo nasa hle a. Danin a sawi angin an case dawnte chhuitu tur Enquiry Wing an neih loh avangin harsatna lian tak an tawk mek a. Loh theih lohna avangin Mizoram sawrkar Agency ACB an hman avangin duh angin an hnu chhuina kawngah an chak lo niin MZP chuan a hria a ni. A rang thei ang bera Enquiry Wing din turin MZP chuan sawrkar a ngen nghal a ni.

Lokayukta-ah hian thawktu indaih lohna a nasa hle a, Act-in thawktu mi 93 awm tura a tih laiin tunah hian thawktu mi 42 chiah an awm mek a. Thawktu indaih lohna hi mi 49 lai a ni a. Tuna Mizoram Lokayukta a thawktu tam ber pawh department dang a mi deputation a pawh chawp leh Contract basis deuh vek an ni a. Thawktu thenkhat phei chuan hna tha zawk an hmuh avangin an bansan fo bawk tih hriat a ni. Tuna Lokayukta awmdanah hian Eirukna do tak tak tura beisei chi niin a lang lova, ngaihsak an tul takzet niin MZP chuan a hria a ni.

Tunah hian Mizoram sawrkarin Lokayukta dan siamthat a tum mek niin hriat a ni a, he dan hi siamthat a nih pawhin a nih tur ang taka kalpui hi MZP chuan a duh takzet a. Mite ber atanga Chief Minister thlenga chhui thei tur leh, eirukna a inhnamhnawh tu pawh hremna pe thei tur a thuam chak hi MZP chuan a phut tlat a ni.

MZP chuan Mizoram a eirukna leh lemhletna dona atan Mizoram-ah Lokayukta hman a nih theih nan kum 2012 atang khan hma a la tan a. Kum 2014-a Mizoram Lokayukta Bill Mizoram Legislative Assembly-in a passed pawh khan beiseina sang tak nen a thlir a. Kum 2019 atanga function anih atangin beisei a phak tawk lohna awmte pawh siamtha turin MZP chuan Mizoram sawrkar a ngen takzet a, a tul angin MZP chuan a enzuiin hma a la zel dawn a ni.



(CHINKHANMANGA THOMTE)
Asst. General Secretary