MZP PRESS RELEASE

Mizo Zirlai Pawl (MZP) General Headquarters, Aizawl buatsaihin vawiin March 6, 2023 chawhnu khan Vaivakawn Cultural Centre Cum Auditorium-ah 1966 March 5-a Bomb hmanga Mizoram beih a nih hriatrengna 'Zoram Ni' hman a ni a, Rajya Sabha MP Pu K Vanlalvena chuan khuallian niin a hmanpui.

He hun hi MZP Vice President Pu Andrew F Lalramnghaka'n a kaihruai a, BCM Aizawl East bialtu Pastor Rev. C Chhuntluanga chuan hunserh a hmang a. MZP General Secretary Pu Jacob Lalmuanpuia chuan Zoram Ni hman chhoh dan report a pe.

Khuallian Rajya Sabha MP Pu K Vanlalvena chuan, "a nawlpuia hnam tana kan lo tawrhna nasa ber hi Zoram Ni tia kan sawi ṭhin, Jet Fighter hmanga India sawrkarin min beih chiamna ni hi a ni," a ti a. "Independence tum tawh lo ang maia kan awm lohna ni atan hman tur a ni!" a ti a, "independence hi kan la tum reng tur a ni" a ti bawk.

Khuallian chuan, Pu B. Vanlalvuana ziak, "Ram zun ngaih leh di zun" tih rambuai lai chanchin ziakna lehkhabu a tlangzarh nghal bawk. 

He huna thusawitu dang MZP President Pu Lalnunmawia Pautu chuan, "Ram leh hnamin hun harsa a tawh hi theihnghilh mai chi a ni lova, phuba lak tumna leh thinrim tharna tur a ni lova, hnam anga tanrualna leh inpumkhatna ni atan i hmang ang u" a ti. 

Vawiin Zoram Ni-ah hian mi sawm bik kalkhawmte Zoram Ni chungchangah kawm an ni a. Zirlai kalkhawm te'n ngaihnawm an ti hle.

He hunah hian Govt T Romana College, Govt J Thankima College, Govt Aizawl College leh Liansailova Institute of Technology zirlaite bakah Party hrang hrang leh NGO hrang hrang aiawhte an tel a ni.


Sd/-
(H LALTHUTHLUNGA ZATE)
Secy. i/c Publicity 

No. E-93/MZP-GHQ/2021-2023/93            Dated, Aizawl, the 6th March, 2023