No. E-93/MZP-GHQ/2021-2023/108     Dated, Aizawl, the 4th May 2023

MZP PRESS RELEASE

Manipur state-a chi leh chi kara buaina chhuaka Zo hnahthlakte dinhmun chu MZP-in a thlir a, a theih ang angin an tan hma a la mek zel. 
 
      Hemi chungchangah hian May ni 4 tlai dar 3:30 khan MZP hruaitute leh Adviser te’n Chief Minister Pu Zoramthanga chu a office-ah kan hmu a, Imphal-a Mizo zirlaite chu an sahimna atan lak chhuah ni se tiin an ngen a. Chief Minister Pu Zoramthanga chuan, Imphal-a Mizo zirlaite chu thlawhtheihna hmanga thiar chhuah a mul a nih chuan Mizoram sorkar a inhuam thu leh hmalak nghal a nih thu a sawi a ni. 
 
      Imphal-a Zofate chu chhuah an phalsak an ni lo a, hei hi MZP chuan hriatthiam har a ti hle. Mizoram Chief Minister Pu Zoramthanga leh Pu K. Vanlalvena MP (RS) ten chak taka, India sorkar leh Manipur sorkara thuneitute rang taka bia a, kil hrang hrang amanga hma an lak nghal avangin MZP chuan lawmawm a ti hle. 
   
      Manipur-a buaina chhuak chungchangah mi mhenkhatin MZP-in Zofate thlavang hauhna thu a chhuah avanga buaina hi chhuak angin thu an thehdarh a, hei hi Zofate tihphel tumna leh thiam loh chantir tumnaah MZP chuan a ngai a ni. MZP-in thuchhuah a siam avanga buai an ni lo a, an buai avangin MZP chuan thuchhuah a siam zawk a ni. 
   
    He thil thlen chhan hi, Manipur sorkarin, Manipur-a kan unauten kum za tam tak an lo luah tawh ram, Reserved Forest Area-ah puang a, nasa takin a nawr chep mek vang a ni a. Hetiang hi kan unau ten duh loin hma an la ta a ni. Kan unaute nawr chepa an awm laiin MZP chuan an thlavang a hauh a, hetiang hi thil awm dan dik tak a nih zâwk avangin, kan thuchhuah leh kan hmalakna avang hian, Manipurah buaina a chhuah phah lo a, Zofate nekchepa an awm avanga an dikna chanvo chang tura hma an laknaah MZP chuan a thlawp thu a sawi zawk a ni. 
 
    Tunhma atangin, khawvel hmun hrang hranga Zofate ten harsatna an tawh chuan, MZP chuan an thlavang hauhna a lo nei tawh mhin a, an thlavang hauhna pawh kan nei zel bawk ang. Hetiang buaina a chhuah châng hian, Mizoram chhunga hnam dang cheng ten harsatna an tawh palh theih thil thuah, MZP chuan mawh a phurh loh tur thu a lo sawi tawh mhin bawk. 
 
                            Issued by: MZP General Headquarters, Aizawl