MZP PRESS RELEASE

Manipur tualchhung buaina avanga Zofate tawrhna chungchangah vawiin June 15, 2023 chawhnu dar 1 khan MZP Pisa Pui-ah Mizo Zirlai Pawl (MZP) General headquarters, Aizawl hruaitute leh All Mizoram Manipuri Association (AMMA) hruaitute nen inkawmhona neih a ni.
He hun hi MZP President Pu Lalnunmawia Pautu chuan a kaihruai a,  AMMA hruaitute hi an President Wahengbam Gopeshore hovin hruaitu 6 an tel a. AMMA ten June 14-a Mizoram Larsap kaltlanga India President hnena an thu thlente an sawifiah a, pawl pahnih hmalakna te ngaihthlak a ni.

MZP leh AMMA chuan Manipur buaina avanga Zofate tawrhna chu sutkian a nih theih nan Meitei hruaitute’n theihtawp chhuahin hma la se; hemi chungchangah hian Union Home Minister leh Manipur Chief Minister hmuin sawipui se tih a ni.

MZP President chuan, “Nangni Mizoram-ah zalen taka in awm laia Manipur-a Kan unaute tawrhna hi en liam mai mai harsa kan ti a. Thil tha zawk a thlen theih nan hma in lak loh chuan in chungah a chhe ber pawh thleng thei a ni,” a ti a. “Manipur Zofate chunga thil thleng ang hi in chungah thleng ve se in duh a nih loh chuan a rang lamin buaina a reh theih nan hma in lak a ngai,” tiin, “in hmalakna kan enzui zel ang,” a ti bawk.

He inkawmhona hian Manipur-a Zofate tawrhna a reh theih nana All Mizoram Manipuri Association hmalakna leh hmalak dante chu hun remchang hmasa bera thlirho leh turin thu dah a ni.


Sd/-
(JACOB LALMUANPUIA)
 General Secretary

No. E-93/MZP-GHQ/2021-2023/124      Dated, Aizawl, the 15th June, 2023