MZP PRESS RELEASE

Mizo Zirlai Pawl (MZP) General Headquarters, Aizawl chuan June 28, 2023 zan dar 8 khan MZP Conference Hall-ah Manipur tualchhung buaina duh lohna leh remna leh muanna a awm theih nan Bati Chhitna hun a hmang.

He hun hi MZP General Secretary Pu Jacob Lalmuanpuia chuan a kaihruai a, MZP President Pu Lalnunmawia Pautu leh NESO Vice Chairman Pu Ricky Lalbiakmawia Colney te’n thu an sawi.

‘Candle Light Vigil for Peace in Manipur,’ ah hian MZP President Pu Lalnunmawia Pautu chuan thu sawiin, “Manipur tualchhung buaina tuartu Zofate tawrhna hi kan tuarna a ni a, MZP chuan he buaina hi a chhuah tan tirh atangin tha thlah lovin kawng hrang hrangin Zofate himna atana hma a la.” a ti.

MZP President chuan, “He buaina avanga kan unau nunna chante leh in leh lo chan zawng zawngte MZP chuan a hre renga, pawi a ti hle a. He buaina hi Zofate thendarhtu ni lova tipumkhattu nise tih chu MZP duhdan a ni a. Zofate’n dinhmun harsa leh khirh tak tak pawh hmachhawn thin mahila, hnung tawlh lova hma lam pan zel tur kan ni,”  a ti a, “MZP chu Zofate tan a ding zel dawn a ni,” a ti bawk.

NESO Vice Chairman Pu Ricky Lalbiakmawia chuan, “NESO chuan Manipur buaina hi pawi a ti tak zet a, Hmarchhak state a zirlai pawl hrang hrangte pawhin remna leh muanna a awm thuai theih nan beih zel kan tum a. A tul angin hma kan la zel dawn a ni,” a ti.

NESO Vice President chuan, “He buaina chungchangah hian India Prime Minister Narendra Modi a la ngawi tlat mai hi NESO chuan mak a tiin pawi a ti hle a. Bay of Bengal piah lam hi India ramah min ngai ve lo em ni,” a ti a. “He buaina chungchangah hian Sawrkar laipui leh Manipur sawrkar chu a hlawhchham hle a ni,” a ti bawk.

‘Candle Light Vigil for Peace in Manipur,’ hi North East Students Organisation (NESO) hnuaia zirlai pawl hrang hrang te’n vawiin June 28, 2023 hian a rualin Northeast state hrang hrang pasarih-ah hman a ni.

NESO hnuaiah hian North  East State hrang hrang aiawh zirlai pawl pariat; Mizo Zirlai Pawl, All Assam Students’ Union (AASU), All Arunachal Pradesh Students’ Union,  Naga Students’ Federation, All Manipur Students’ Union, Twipra Students’ Federation, Khasi Students’ Union leh Garo Students’ Union te an awm a ni.


(H LALTHUTHLUNGA ZATE)
Secretary i/c Publicity

No. E-93/MZP-GHQ/2021-2023/127      Dated, Aizawl, the 28th June, 2023