No. E-93/MZP-GHQ/2021-2023/128      Dated, Aizawl, the 1st July, 2023

MZP PRESS RELEASE

Mizo Zirlai Pawl (MZP) General Headquarters, Aizawl buatsaihin nizan June 30, 2023 dar 8 khan Vanapa Hall-ah Remna Ni 2023 lawmna hun hman a ni a, Chief Minister Pu Zoramthanga chuan khuallian niin a hmanpui.

He hunah hian rambuai laia remna zawnga kohhran-in theihtawp chhuah a tha a thawh avangin kohhran hmingin Mizoram Kohhran Hruaitute Committee (MKHC) hnenah chawimawina hlan a ni.

Chief Minister Pu Zoramthanga chuan, “Remna thuthlung ziah zan tluka mipui an hlim leh lawm kha Mizoramah sawi tur a la awmlo tia sawi thin a nih thu leh, hun kal zelah erawh chhan hrang hrang avangin remni ni pawimawhna a lo chul zel tak thu a sawi a. Remna nei tura kalkawng biboh tak leh harsa tak te, thil thleng tam takte chu sawi zui a hlawh loh emaw, ngaihpawimawh a nih loh chuan kan history a thil pawimawh tak chu engmah lovah a chhuah theih laiin, thahnemngai taka thang lo thar leh zel te'n hnam chanchin leh hun kal tawh a thlir let a an hriatthiam theih tura ruahmanna an lo siam chu ropui a tih thu sawiin MZP chungah lawmthu a sawi.

Pu Zoramthanga chuan, hnam thinlung put hi ram hung nan, kan him nan a pawimawh a ni tiin, ramin hun khirh a tawn changin a lo fiah zual thin thu a sawi.

MZP President Pu Lalnunmawia Pautu chuan thu sawiin, Hnam dang pasal neite, Sap pasal a ani emaw vai a ni emaw pasal neite kan ram rorelna sangah thut tuma bei an awm,  tih sawiin, MZP chuan ngun takin a ngaihtuah a, kan pi leh pu, kan sipai huaisen, hnam pasaltha ten zalenna, rorelna kan neih an sual chhuahah hian an thut ve kan rem ti lo," a ti a. "MZP chuan theihtawpin kan theihna apiangah kan dodal zel dawn a ni," a ti.

Pu Lalnunmawia Pautu chuan, "tunhnaiah sawrkar hnathawk pension kum tihsan tumna a awm a. Thalai hna zawng tam tak, thiam tak tak an awm lai a, pension kum tihsan tumna hi MZP chuan a tawp thlengin kan dodal dawn a ni," a ti bawk.

He hunah hian Greenland HSS, Mount Carmel HSS, St Anthonys HSS leh St Joseph HSS zirlaite atangin Hnam lam, lem chan leh zai te ngaihthlaka thlirho a ni a. Zirlai pawl hrang hrang leh tlawmngai pawh hrang hrang hruaitute leh political party aiawhte he programme ah hian an tel a ni.

Inkhawm hi MZP Vice President Pu Andrew F. Lalramnghaka chuan kaihruaiin MZP General Secretary Pu Jacob Lalmuanpuia hnen atangin report ngaihthlak a ni a. Asst. General Secretary Pu Chinkhanmanga Thomte chuan chawimawina hlanna a kaihruai a ni.



(H LALTHUTHLUNGA ZATE)
Secretary i/c Publicity