Aizawl, the 30th November: Mizo Zirlai Pawl (MZP) General Headquarters, Aizawl chuan vawiin November 30, 2023 chhun dar 12 khan MZP Conference Hall-ah Executive Meeting vawi - 625na (2023-2025 term-ah vawi 3na) a nei a. He hunah hian Job fair chungchang, Nationalism & Career Awareness campaign chungchang leh pawl chhung thil pawimawh tak takte rel niiin, meeting hi MZP President Pu H Lalthianghlima'n a kaihruai.
Meeting chuan, ram leh hnam hmangaihna kawnga thalaite harh thar nan leh hna zawnna kawnga thalaite inhrilhhriat nan ram pum huapin Nationalism & Career Awareness campaign neih a rel a. MZP Pisa Pui khar hun atan December 15, 2023 a ruat bawk.
MZP chuan ram leh hnam him zawk nan hnam dang dan lova Mizoram-a eizawngte dapchhuah kawngah nasa takin hma a la thin a, hetiang hunah hian ram hruaitu leh mi pawimawh zingah hnam dang thlavang hauh an awm thin chu MZP chuan pawi a ti takzet a, a dem takzet a ni. MZP chuan, Kan ram leh hnam him zawk nan a ni tih hriaa MZP hmalaknate thlawp zel turin mipuite a sawm a. Ram hruaitu hnam dang thlavang hauh ching an awm chuan an hming a puangzar hreh dawn lo a ni.
Vawiin meeting-ah hian MZP President Pu H Lalthianghlima chuan MZP Calendar 2024 a tlangzarh nghal bawk a ni.
(C LALROSANGA)
Secretary i/c Publicity
0 Comments