Mizoram Board of School Education (MBSE)-in May ni 14, 2024 (Thawhlehni) chhun dar 12:00 a High School Leaving Certificate (HSLC) 2024 result felfai tak, a tichhuak thei chu MZP chuan lawmawm a ti hle a. MBSE thawktute thawhrimna leh inpeknaah MZP chuan lawmthu a sawi a ni. 


MZP chuan kumin HSLC exam result a titha zual, top ten-ah Mizo zirlai mi sawm pathum (13) lai an lang chu lawmawm a ti takzet a, tunhma result nena khaikhin phei chuan hmasawnna lian takah a ngai a ni. 

MZP chuan zirlai hlawhtlinna chang zawng zawngte thinlung takin a lawmpui takzet a. Chutih rualin, la hlawhtling ve rih lote leh Comparmental chance la nei zawng zawngte pawh beidawng mai lova, rilru thar nen hmalam pan turin duhsakna a hlan a. A lehpekah chuan hlawhtlinna chang ngei tura bei sauh sauh turin MZP chuan duhsakna a hlan nghal a ni.

MZP chuan, HSLC result chhuakah khan nikum 2023 aiin zirlaite pass an thahnem zawk chu lawmawm a ti hle a. Nikum khan zirlai HSLC Exam hmachhawn zingah 71.14% pass-in, kumin HSLC result chhuak-ah hian zirlai 73.37% an pass thung a, hei hi hmasawnna ropui takah MZP chuan a ngai a ni.  

MZP chuan kum 1995 atanga a lo tih thin angin, HSLC Top-10 a Mizo tlingte a chhuan zia leh duhsakna lantir nan leh Mizo zirlaite inkarah inelna thianghlim a awm theih nan, kar leh ni 23  May, 2024 (Ningani) hian Vanapa Hall-ah anmahni chawimawina hun a buatsaih leh dawn a ni.

MZP-in kumtin a buatsaih thin, Inter High School Quiz 2023 a tel zirlai zingah HSLC Top-10 a tling an awm nual hi MZP chuan lawmawm a ti takzet bawk a ni.