He hunah hian Pu H. Lalthianghlima President-in thu a sawi a, Pu Chinkhanmanga Thomte General Secretary-in report a pein, Nula Zonuni kaihhruaina hnuaiah sawihona neih a ni. Heng mite hi Panel-ah an thu a, chungte chu:
1. Pu Hrangtawna, IRTS (Rtd), Consultant, GoM
2. Dr. James LT Thanga, Asso. Professor, MZU
3. Pu ZR Thahmingliana, Chairman, Mizoram First
4. Dr. Vanlalremruata Tonson, Adviser MZP GHQ
Talk Show-ah hian; Party hrang hrang- AAP, BJP, PC, INC, MNF leh ZPM te an tel a. Civil Society (NGO) hrang hrang; CYMA, MUP, MHIP, SSU, MTOA, MTA, MIMA, MBA, MZU Discussion Forum, CESJ, JAC on ILRF, MCO, ZDU, V.C Sihhmui leh Joint YMA Bairabi te an tel a. Prominent Citizens engemaw zat an tel bawk.
He programme-hi Local T.V lamah pekchhuah a nih dawn bakah, Youtube lamah dahchhuah a ni ang.
Talk Show hi Aizawl Smart City Ltd. leh Allied Concern ten an sponsor a ni.
He huna MZP General Secretary report:-
1. MZP Danbu, pawl thiltum 11 zingah; "Inchimral theihna laka Mizo Hnam humhalh." tih a chuang a. He mi kawnga kan hmalâkna hi ṭhenkhat chuan kuang lo nawr min tihpha fo thin.
2. MZP Rorelna sang ber dawttu, Federal Council Sitting vawi 57-na, ni 11 April, 2024 a neih chuan, "Sairang thlenga rel a lo luh thuai dawn avangin, Sawrkar in Inner Line Permit (ILP) check dan turah ruahmanna felfai zawk a siam theih nan, MZP in hma la rawh se." tih leh "Zofate sumdawnna leh inchimralna kawng a kan him tlan theih nan, MZP hian zirchianna leh inhrilhhriatna (Awareness Campaign) nei se, a tul anga hmalak ni rawh se" tih chu lungrual taka pass a nia.
3. He kan rorelte hi chak taka bawhzui niin; ILP tihchak lehzual dan tura pawl ngaihdan hrang hrang, Point 9 lai chu ziakin Chief Minister hnenah ni 19 April, 2024 khan pek a lo ni tawh a ni.
4. Vawiinah hian, chumi kawnga kan hmalakna peng pakhat atan, "Rel kawng leh inchimralna" tih thupui hmangin Talk Show on Mizo Nationalism hun hman a ni ta a ni.
5. Vawiinah hian Panel atan mi thiam rual, kan thupui chungchanga hriatna thuk tak neite kan sawm a. Hetiang lam vei leh a kaihhnawih nia kan hriat pawl hrang hrang kan sawm bawk a. Thlirtu mipuite tan a hlawkthlak ngei kan beisei a ni.
6. Hman atanga MZP ngaihdânah chuan, Bairabi-a Rel lo lut hi a tawk hleah kan ngai a. Sairang thlênga Rel lut tur pawh kha kum 2009 khan nasa takin MZP chuan a lo dodal tawh a. "Thliarkar rilru pu, hmasawnna awmze hre lo, sum duh vanga sawrkar dodal, globalisation khawvela inkharkhip tlat duh ho" tiin tawngkam chhe tinrengin MZP chuan beih a lo tawk tawh a. MZP ngaihdan erawh chu, "kan ram inrelbawlna a puitling tawk si lo a. Rel lo lut turin a ken tel hnam dang lo lut huk (influx) control turin kan system hi a pachhe rih si a. Development avanga kan hnam himna a chhiat ai chuan, development Welcome rih loh hi kan hnam tan a ṭha zawk a ni" tih hi a ni reng thin a, a ni zel bawk ang.
7. Vawiina kan thupui, "Rel kawng leh inchimralna" tih hian a tum chu- Kan duh emaw duh lo emaw Sairang thlengin Rêl head a lo lut ngei dawn si a. Hei hi engtin nge kan lo hmachhawn ang? Eng tianga lo dawnsawn tur nge? Sawrkar leh mipuite kan inpeih em? Heng hmasawnna hi kan ṭhatpui ang nge kan chhiatpui ang? Eng tin nge Mizote kan lo inbuatsaih ang? tih hi phawk chhuak ila kan duh a ni. Sawrkar hotute leh a entu mipuite tan pawh hlawkthlak tak a nih ngei kan beisei a ni.
8. A tawp berah chuan; kan Panel te leh kan mi sawm NGO, Party hrang hrang leh Prominent Citizen lo tel zawng zawngte chungah lâwmthu kan sawi a. Kan senso mamawh ang min pe tu, Aizawl Smart City Ltd. leh Allied Concern te chungah lawmthu kan sawi e.
0 Comments