Ni 7 May, 2025 (Nilaini) chawhma dar 11:00 khan Mizo Zirlai Pawl (MZP) General Headquarters, Aizawl chuan High School Leaving Certificate (HSLC) Examination 2025 Top 10-a Mizo tlingte chawimawina hun Vanapa Hall-ah a buatsaih a, Pu K. Sapdanga, Home Minister chuan Khuallian niin hun a hmanpui.

Khuallian Pu K. Sapdanga chuan, Zirlai pass thar zawng zawngte in thiamna aiin in tumruhna a pawimawh chho dawn a, tumruhna nen hmalam pan turin ka fuih che u a ni a ti a. Zirlaite tan mahni tuina kawng thlân fimkhur a pawimawh hle a, chu chuan in hmakhua thui tak a hril dawn a ni a ti a. Mizoram leh hnamin a mamawh em em All India Service-ah luh tum turin zirlaite a fuih a, Mizo C.D leh S.P tur an tlem tawh thu uar takin a sawi. 
 
HSLC 2024 Top 10-a Mizo tling chawimawite hi mipa 13  leh Hmeichhia 9 an ni a. Zirlaite hi chawimawina thuziak, topper cheng 10,000/-, 2na atanga 10na cheng sangnga 5,000/- theuh hlan an ni a. Pu F. Vanlalrochana lehkhabu ziah 'Chhungril chakna' leh Lalhmachhuana Zofa lehkhabu ziah 'Mizoram GK Mini Edition', leh Duhthusam Ram Lehkhabute hlan an ni. 

He hun hi MZP General Headquarters Vice President Dr. C. Lalremruata'n a kaihruai a, Pu Chinkhanmanga Thomte General Secretary-in report pein, Baptist Church of Mizoram President, Rev. Dr.C. Vanlaldika'n hunserh a hmang a, GIG Motors CEO John Lalpeka'n thu a sawi bawk.

MZP chuan HSLC Top 10 a Mizo tlingte chawimawina hi, kum 1995 atangin kumtin a buatsaih thin a. MZP inter HS Quiz a tel zirlai pang (5) te Top-10 ah hian an lang a ni.