Vawiin October ni 27,2025(Thawhtanni) hian MZP din champhaphak, Zirlaite Ni leh MZP Kum 90 tlin lawmna chu I&PR Auditorium ah MZP General Headquarters, Aizawl buatsaihin hman a ni.

He hun hi Pu Sanghmingthanga ,Vice President MZP chuan a kaihruaiin, Kum 1935 atanga MZP President lo ni tawh te hnenah MZP Kum 90 tlin lawmna pual hian chawimawina hlan an ni.Tin, MZP President Pu Zokailiana Khiangte ni 13.10.2025 (Thawhtanni) a boral ta sunna hun hman a ni bawk.

He hunah hian MZP President nilai Dr. C. Lalremruata chuan,,”Hruaitu lo ni tawh zawng zawng te chu MZP kal leh zelna tur atana rilru ngaihtuahna seng thar tur leh MZP Pisapui lamah pawh lawilut tam lehzual turin a sawm a.MZP kum 90 tlin theih chhan chu hruaitu hmasa te thawhrah liau liau a ni” a ti. “MZP chu zirlai pawl a nih angin zirna an ngaipawimawh tur a nih rualin nationalism an buaipui lo a nih chuan MZP chu engtikahmah a sang ngai dawn lo a ti a, zirna leh nationalism chu Mizo Zirlai Pawl innghahna, a lungphum a ni a, rualkhai taka a kal zel theih nan theihtawpa hmalak a tul hle a ni” a ti.

MZP Adviser, Dr Vanlalremruata Tonson chuan Zirlaite Ni Thupui Zirlaite Hmathlir sawina neiin MZP President lo ni tawh zinga damlai upa ber Prof. JV Hluna MZP President (1977-1978) chuan hruaitu hlui aiawhin thusawina hun a nei bawk.

2nd Session-ah hruaitu lo ni tawhte pual a hun hman a ni a. He hun hi Pu C.Lalrokhuma Adviser MZP in a kaihruaiin, hruaitu lo ni tawh te atang thu tha tak tak ngaihthlak niin hun hlimawm tak hman a ni bawk.

Zirlaite Ni puala thuchah a sawiah Education Minister Dr. Vanlalthlana pawhin MZP din champhaphak vawi 90-na leh Zirlaite Ni pualin Mizoram chhung leh pawna zirlai zawng zawngte chu an zirna kawngah Pathian malsawmna an dawn zel theihnan duhsakna hlanin chibai a buk a, zirlaite chu rilru hriselna tha tak nei tura chahin ruihhlo leh zuk leh hmuam laka insum turin a chah a, zirlaite chu ram leh hnam hmakhua an nih avangin rilru leh taksa hrisel tak nei turin a chah a ni.

Zirlaite Ni leh MZP Kum 90 tlin lawmna pual hian MZP General Headquarters chuan ni 26. October. 2025 khan Gan Sabra Luangmual leh Hmangaihte Rûn , Zemabawk ah luanchhuahna hun an lo nei tawh bawk.



(Moses Vanlalsawma)

Secretary i/c Publicity

MZP General Headquarters