August ni 21, 2026(Zirtawpni) tlai dar 4:20 khan Mizo Zirlai Pawl (MZP) General Headquarters hruaitu te chuan Chief Secretary Khilli Ram Meena a Pisa-ah hmuin, thil pawimawh hrang hrang an sawiho a, Chief Secretary hi Dr YLN Reddy, Secretary DP & AR (GSW) in a tawiawm a. MZP hi President Dr C. Lalremruata hoin Office Bearers te leh NESO Vice Chairman Pu Ricky Lalbiakmawia te an tel a ni.

 MZP hruaitute chuan, tun hnaia MPSC siamthat hnatlang an koh chhan leh koh a nih dan te, thalai hnazawng mek ten harsatna an neih hrang hrang bakah MPSC-a an ngaihmawh hrang hrang te an thlen a ni.

Chief Secretary chuan, MZP leh thalai hnazawng ten an beiseina neih dan chu sorkarin a hria a, an thilphut hrang hrangte chu thil awm taka nih thu sawiin chumi avang chuan Reform Committee pawh din a ni a ti a. Hemi chungchangah hian amah ngeiin Chief Minister a hmuh thu leh Chief Minister pawhin alo ngaih pawimawh thu a sawi.

Reform Committee chu Sorkar officer senior leh tawn hriat ngah tawh tak tak vek leh department hrang hrang aiawh an nih avangin MZP chuan ring ngam turin a ti a. Reform Committee-ah hian chairman-ah DP&AR secretary, member secretary-ah DP&AR joint secretary, member-ah MPSC secretary, Law & Judicial addl secretary, GAD addl secretary, Home add secretary leh Finance addl secretary te an ni a.

Committee-in enfiah tura tih zingah, MPSC dan leh inkaihhruaina awmsa, sawrkar hna lak dan, a kalphunga inhnerem lo lai endik leh thawktu indaih lohna avanga langtlang leh felfai taka hna lak kawnga harsatna awm thei; hna diltute inziahluh dan kaihhnawiha siamthat ngai nia hriat; hna lak dawna tih dan hrang hrang kalpui chhoh dan endik; result siam leh puan chhuah dan bakah candidate lungawilote lo dawnsawn leh an harsatna enpui/sutkian sak dan tur tha zawk; hna diltu zawng zawng an len vek theihna tura kawng sial dan leh tul dang nia an hriat pawh an hma tur zingah hian a tel a ni.

Chief Secretary chuan, Reform Committee in a MPSC leh a kaihhnawih pawl hrang hrang zirlai pawl te pawh tiamin an rawn tur thu leh rawtna leh siamthat ngai nei te tan duh dan thlen theihna reng a nih tur thu a sawi bawk.

Hemi chungchangah hian MZP GHQ leh Aspirant te pawhin rawtna an thlen tur thu Chief Secretary hi an hrilh bawk a, MPSC siamthat duhtute chuan rawtna an neih ang angte thlen ngei turin MZP chuan a sawm nghal bawk a ni.

MZP hruaitute chuan, Central agencies hrang hrang heng Enforcement Directorate (ED), National Investigation Agency (NIA), Income Tax ten a Mizoram Sorkar leh Police te hriatpuina tel loa Mizo mipui ti thlabar zawnga harsatna an siamsak thin chungchang pawh sawipuiin, Dan anga hmalakna chu MZP chuan a thlawp tlat a, chutih ruala mipui leh sumdawng thenkhatte tana harsatna an siam thin chu MZP chuan pawi a ti hle a, hetiang thil hi thleng nawn tawhlo turin a duh a ni. Heng hmalakna te hi kan ram leh hnam tan a him tawkloin MZP chuan a hria a, Chief Secretary hnenah a tul ang a hmala turin ngen nghal a ni.

Chief Secretary chuan, thuneitu leh heng agencies thuneitute hnenah thlen a, a tul ang a hma a lak tur thu a sawi.