Mizo Zirlai Pawl (MZP) General Headquarters, Aizawl
chu vawiin August ni 14, 2026(Zirtawpni), chawhnu dar 12:30 khan MZP President Room-ah neih a ni a, Meeting hi MZP President Dr. C. Lalremruata'n a kaihruai.

 



Meeting chuan, MZP Rorelna sang ber dawttu, MZP Federal Council neih hun atan August ni 31, 2026 a ruat a. Tin, MZP Rorelna sang ber, MZP Inkhawmpui lian Assembly vawi 71-na chu September ni 23-25, 2026 chhungin Darlawn-a neih turin a rel bawk.

 



Meeting chuan, Mizoram sawrkarin a Mizoram Public Service Commission (MPSC) siamthatna kawnga hmala tu tur MPSC Reform Committee a din ta chu lawmawm a ti hle a, an hmalakna enzuitu tur leh rawtna hrang hrang thlen tur ngaihtuah turin Study Group a din nghal a ni.

 

MZP chuan, Ministry of Home Affairs in a India National Song- "Vande Mataram" India ram chhunga zirna in zawng zawnga sak chhuah ngei tur thupek a chhuah chungchangah March 9, 2026 khan press conference neiin, Zirna In zawng zawnga Vande Mataram sak chhuah emaw, ngaihthlak chhuah emaw ngei ngei tura tih chu a duh loh thu a lo sawi tawh a, meeting chuan an dinna ngaiah ala din reng thu leh Mizoram chhunga zirna in hrang hrangah tih luihna hmanga sak tir kan nih loh nan hmalak nise a ti. Zirna in chu thiam zirna tur a nih angin Politica thila hman MZP chuan a phal ngai dawnlo a ni.

 

MZP in a kum 2015 atanga September ni 2 apianga alo hman thin - "Hnamdang Nupui Pasal neilo tura inzirtirna ni" chu kumin 2026 pawh hian hman leh ngei nise tiin a rel a, Zirna In (Educational Institutions) hrang hrangah kumdanga tih thin angin thusawina hun neih leh ngei nise an ti bawk.

 

Tin, Meeting chuan Mizoram Hnam Hla (Official State Song) atan - ‘Ro Min Rel Sak Ang Che’ tih hla Pu Rokunga phuah chu Council of Ministers (Cabinet) thukhawmin an pawm chu lawmawm a ti hle a ni.